По Витни трагичен крај и за Боби Кристина

Боби Кристина, ќерка на познатата пејачка, Витни Хјустон и нејзиниот партнер Боби Браун, почина на само 22-години.

-Боби Кристина Браун почина на 26-ти јули 2015-та година опкружена со најблиското семејство. Нејзината душа конечно е во Божји раце. Им благодариме на сите за љубовта и поддршката во текот на последните неколку месеци, стои во соопштението од семејството. 

Кристина ги помина последните 6 месеци во кома откако мистериозно беше пронајдена онесвестена во својата када, свртена со лицето кон водата. Поради повредите на мозокот, лекарите исклучија секаква можност за закрепнување, па Кристина беше исклучена од апаратите и оставена да почине природно.

Околностите под кои Боби Кристина заврши во несвесна состојба се уште се под истрага, а според порталот TMZ, случајот понатаму ќе се води како убиство во кое главен осомничен е партнерот на Боби, Ник Гордон. Гордон претходно доби кривична пријава за насилство врз Боби Кристина, како и за крадење од неа додека била во кома.

Непосредно пред несреќата Кристина му се доверила на пријател дека Гордон не е човекот кој што таа мисли дека е и се договорила да се сретне со истата личност на 31 јануари. Но, Боби никогаш не стигнала на договорената средба бидејќи имала расправија со своето момче, по што е пронајдена онесвестена, со потечени усни и скршен заб.

Истрагата допрва треба да ги расветли околностите под кои се случи несреќата на Кристина и дали навистина станува збор за убиство или пак за несреќен случај. Боби Кристина беше единствената ќерка на легендарната Витни Хјустон, која во 2012-та беше пронајдена мртва во бањата на својата хотелска соба. 

Родена во свет на интриги и дрога, за многумина Боби Кристина, едноставно беше предодредена да умре и да заврши трагично како и нејзината мајка.

Самоубиство по раскинувањето: Девојката на Џим Кери пронајдена мртва

Поранешната девојка на Џим Кери е пронајдена мртва, само неколку дена откако со актерот, со кој беа во три годишна врска, раскинале по втор пат.

Во понеделникот вечерта, 28-годишната Катриона Вајт ја пронашле нејзини двајца пријатели, откако загрижени отишле во нејзиниот дом во Лос Анџелес за да проверат што се случува со неа. Таа наводно имала оставено порака пред да си го одземе животот, во која открила дека раскинала со Кери на 24-ти септември. Тоа е истиот датум кога напишала и загрижувачка порака на Твитер, велејќи „Се одјавувам од Твитер, се надевам дека бев светлина за моите најблиски и најдраги“.

Иако покрај нејзиното тело биле најдени таблети, заради што се претпоставува дека таа си го одзела животот со предозирање, официјална потврда сè уште не е направена.

По трагичната вест за нејзината смрт, Џим Кери го искажал своето жалење.

- Таа беше вистински и деликатен цвет, премногу чувствителен за ова валкано тло, за кој љубовта беше единственото нешто скапоцено. Моето срце е со нејзиното семејство, пријатели и со сите оние кои ја сакаа и се грижеа за неа. Сите ние сме во шок, како да сме удрени од силен гром, рекол тој.

Почина познатиот диџеј Бабура

По кратко боледување, утринава во Скопје почина познатиот диџеј Бабура, односно Љупчо Петровски (44). Диџеј Бабура беше еден од најзначајните музичари во Македонија кој беше дел од растот на македонската модерна клупска и радиo сцена.

Настапуваше со сите светски диџеи што гостуваа во земјава, а со неговите музички сетови израснаа повеќе генерации во клубовите низ Скопје и низ земјава.

Тој почна уште во деведесеттите години со пуштање музика на радиото „Мега ФМ“, за потоа да продолжи во радио „Антена 5“, а потоа во „Сити радио“.