Конкретно, владејачката партија во Македонија, која лани ја доби довербата на граѓаните за својата политичка понуда, преку своето раководство реши да биде послушна кон своите европски старатели. Заеби гласачи, заеби народ. Оти тој, народот, гласачите, само фиктивно те избира како своја власт. Фактички, те одобрува или те сменува странска сила. Народот ти треба само про форма, за пригодни говоранции, за манифестации и слични неважни работи. Ти треба за во ситуации кога кротко треба да работи ангарија, да се задоволи со леб и вода, да плаќа послушно сметки, да витка грб пред шалтери и шалтерски службеници, пред судии и адвокати, пред извршители и банкари, пред даскали и лекари. Ти треба и за во ситуации кога сакаш да ти го штити задникот. Ништо не му кажуваш. За ништо важно и што го интересира не му даваш ниту отчет, ниту го консултираш или допрашуваш, ама секогаш му велиш дека работиш во негов интерес, божем ти подобро му го знаеш интересот. Демек, поумен ем помудар си од народот на купче. 

Е, тука лежи заебот, а почнува веселата математика во која нема логика, а само проектирани желби и заради што народното искуство запишало дека сметката направена дома и на пазар не се совпаѓа.