Направи сам: Романтично осветлување во дворот

Ако веќе ви здодеа од обичните светилки за во двор и сакате нешто уникатно и впечатливо, тогаш подарете му на вашиот двор едно поинакво осветлување.

Со малку слободно време можете да заштедите на скапите осветлувања и да направите нешто со кое ќе можете да се пофалите, а и да се гордеете на одлично завршената работа.

Инспирирајте се од овие неколку идеи и фатете се за работа:

1. Светилка од хулахоп

Иако изгледа тешко за изработка сепак овој проект е многу лесен и едноставен. Мали се шансите да го згрешите при изработката, а она што добивате е изненадувачки совршено осветлување за дворот. Најдете некој стар хулахоп и обвијте го со фабричка лента, а околу него поставете ги светилките. Додајте синџири, жица или лента на хулахопот за да го прицврстите на плафонот и проектот е готов.

2. Осветлување во тегла

Додајте доза романтика во дворот со овие едноставни светилки направени од тегли. Направете десетина, поставете ги во тревата или закачете на огразата и ефектот ќе биде одличен. Во теглите ставете камчиња, а одозгора ставете ја свеќата. На капаците од теглите додадете синџирчиња доколку сакате некаде да ги прикачите или можете да ги поставите на земја околу масата во дворот.

3. Конзерви како светилки

Искористете ги старите конзерви за да направите осветлување во вашиот двор. Тие се одлични за да ги поставите на вашата маса и да уживате во летната ноќ гледајќи во ѕвездите. На старите конзерви направете ситни дупчиња, а во нив ставете мали свеќички. Низ малите дупчиња ќе излегува нежна и романтична светлина.

4. Свеќи во трупци од дрво

За рустикален изглед во вашиот двор земете неколку трупци од дрво. Исечете ја во круг средината на дрвото, но не премногу длабоко, а потоа додајте вода. Со помош на водата свеќичките ќе пловат слободно и ќе дадат еден поинаков светлосен ефект. За уште поинтересен изглед додајте неколку листови од дрвја до свеќите.

5. Дрвја завиткани во светилки

Наместо да ја отстранувате гранката во дворот која ви пречи, зачувајте ја и искористете ја за нешто уште подобро.  Потребни ви се обични дворски светилки кои ќе ви завиткате околу растенијата во дворот и добивате уникатно решение за вашето дворско осветлување.

6. Камчиња кои светат

Ова е уште една невообичаена, уникатна и евтина идеја за додавање светлина во дворот. Обојте ги ситните каменчиња или било што ќе ви падне на ум со флуоресцентна течност или боја. Расфрлете ги низ дворот или наредете ги по патеката, а во текот на ноќта тие ќе го осветлуваат вашиот простор.

7. Висечки светилки

Оваа идеја можете да ја искористите за некоја посебна пригода во вашиот двор. Набавете си многу мали светилки и поврзете ги со жица или лента. Потоа обесете ги низ вашата градина во различна висина и на различни места. Ќе добиете одличен романтичен изглед во текот на целата ноќ.

Направи сам: Интересни и креативни ламби

Со искорисување на секојдневните предмети, малку вештина и трпение за кратко време во вашиот дом ќе добиете одлични ламби кои ќе бидат одраз на вашата креативност.

За одреден дел од овие ламби ќе ви бидат потребни рециклирачки материјали, така не само што вашиот дом ќе добие нов изглед туку и ќе бидете задоволни кога знаете дека сте допринеле за зачувување на природата.

Проектите „Направи сам” се интересни и предизвикувачки, па наместо да потрошите илјадници на нова ламба заштедете и направете си сами, брзо и едноставно.

1. Ламба од пластични лажици

За оваа ламба потребно ви е големо пластично шише и многу пластични лажички. Исечете ги дршките од лажичката и со лепило зацврстете ги за шишето. Дното од шишето исечете го бидејќи низ тој дел ќе ја внесете сијалицата. Добивате интересна и впечатлива ламба.

2. Закачалки за модерна и забавна соба

Не постои некој кој веднаш не би ја забележал токму оваа ламба од закачалки. Земете бандаж од некој стар велосипед и на него прикачете закачалки кои може да бидат дрвени или пластични.

2. Претворете ја собата во шума

Доколку сакате нешто сосема поинакво што би го истакнало вашиот авантуристички дух, тогаш оваа ламба е создадена за вас. Направете топка од жици кои меѓусебно ќе бидат преплетени, а потоа набавете гранчиња чија намена е за украсување на домoт. Употребете спреј во бела боја и офарбајте ги парчињата со кои работите. Овие два дела спојте ги и не заборавајте да оставите простор за сијалицата. Не ви треба премногу јака сијалица, колку послаба толку поголем ќе биде ефектот на шума во собата.  

3. За боемите

Една од највпечатливите во оваа листа е токму оваа ламба која е направена од шешири. Овој тип ламби би изгледале одлично во просторија со полица за книги. Доколку домот ви е во боемски стил ова е нешто што мора да го имате. Исечете го горниот дел од шеширот, онолку колку што ви е потребно за да помине кабелот во кој ќе ја приклучите сијалицата. Внимавајте на пропорциите бидејќи сијалицата ќе ги држи шеширите. Поставете повеќе од една ваква ламба за повеќе светлина во просторијата.

4. Поинакво кујнско светло

Време е за промена во кујната, а за да постигнете промена направете ги овие едноставни ламби од неколку рендиња. Оваа ламба е многу интересен додаток за кујнската просторија. Направете дупки во рендињата каде што би поминувале каблите од сијалиците, а од нивната долна отворена страна спојте ги со мала светилка.

4. Во облаци

Заспивајте под облаците. Ова е уште една интересна ламба која може, но и не мора да биде само за во детската соба. Лесна е за правење, а со сигурност ќе направи еден посебен осветлувачки ефект. Главниот облак зад кој ќе стои сијалицата е направен од дрво и зад него можете да го поставите главниот притискач за оваа ламба.

5. Лименки

Отворачите на лименката се поврзуваат една со друга на веќе однапред направена форма од жица каде ќе биде сијалицата и кога целата основа ќе ја потполните со овие желевца, на тој начин добивате мала ламба за на работна маса..

Можеби вашата нова купена ламба никој нема да ја забележи, но овие рачни изработки нема да останат незабележани. Со малку труд ќе го добиете посакуваниот резултат.

Која од овие ламби ја посакувате во вашиот дом?

Направи сам: Обичната ламба претворете ја во фантастична

Со помош на неколку хартиени чинии, вашата ламба ќе доживее целосна модерна трансформација и ќе ви стане омилен предмет во домот.

Потребен материјал:

• Рамен оквир на ламба
• 50 Хартиени чинии за пикник во било која боја
• Линијар
• Молив
• Ножици
• Лепило

1. Чекор

Половина од чиниите (25) превиткајте ги на половина и на работ повлечете паралелни линии кои ќе бидат оддалечени 0,5cm од средината.

2. Чекор

Со ножици исечете ги чиниите по повлечената линија за да добиете два еднакви полукруга.

3. Чекор

Другата половина од чиниите (25), свиткајте ги како на сликата. Така добиените чинии премачкајте ги со лепило и залепете ги за капата на ламбата. Чиниите лепете ги една до друга, додека не ја залепите целата ламба и потоа оставете ги да се исушат.

4. Чекор

Откако лепилото ќе се исуши, подготвените полукругови треба да ги залепите на чиниите кои веќе се наоѓаат на оквирот и тоа од двете страни, по самиот раб, така што средината ќе остане празна.

Истакнете ја вашата ламба на некое видливо место во домот и уживајте во фантастичниот модерен детаљ!