Највпечатливите венчални фустани од Високата мода за 2014

Неделата на Висока мода во Париз заврши, но во сеќавање се уште останаа креациите. За невестите кои го бараат фустанот од соништата може да биде инспирација за модел, детаљ…

Диор

Диор претстави една нова и поинаква венчаница. Наместо фустан од сатен, или шифон, тој волуменозноста ја постигна со правење латици од рабовите на материјалот. Она што ја прави оваа венчаница уште повеќе посебна е тоа што секоја од латиците е украсена со бисери, така што доколку би ја носеле, би носеле вистинско богатство на себе. Интересно, ново, а сепак нежно и „невестински“.

Шанел

Нема кој не ја запамети ревијата на Шанел. Сите во фокусот ги ставија патиките, кои беа искомбинирани со свечени парчиња. Но, посебноста на Шанел не е само во тоа. Овој фустан конкретно, за кој многумина би кажале дека потсетува на ноќница, е токму она што Шанел отсекогаш сака да го прикаже – едноставно, а сепак вредно. Во фустан од овој тип можете да се движите лесно, а додатокот на глава е секако ваш избор.

Ели Саб

Ели Саб остана доследен на неговата естетика и материјали. Тантелата е повторно присутна. Ова е потсетување дека венчалниот фустан не мора да е строго бел. Романтичност е во преден план, па овој венчален фустан е совршен за сите оние што сонувале да бидат Дизни принцези.

Валентино

Валентино, познат по везовите, создаде фустан, кој на прва рака многумина го потценуваат, а во суштина е сложен. Оваа креација е класична, но безвременска и многу од идните невести се замислуваат токму во нешто вакво.

Алекси Мабил

Секси, елегантно и софистицирано е она што го претставува овој фустан на Алекси Мабил. Ја следи линијата на телото и е совршен за оние што сакаат малку да отстапат од стандардните, балски венчални фустани.

Џорџ Хобејка

Дводелна венчаница е секако нешто ново, урбано, тренди. Одлична идеја за сите похрабри идни невести, што сакаат да излезат од стереотипниот шаблон. Не само што има топ и долго здолниште, туку и двете парчиња се изработени од различни материјали и во поинакви нијанси.

Шарлот Лиша

Нема потреба да коментираме колку е скап овој фустан. Како и да е, ваквите фустани се наменети за оние девојки и жени што навистина сакаат да бидат кралици на овој ден. Или макар за оние што можат да си го исполнат сонот. Но, останатите ништо не ги спречува да уживаат во раскошноста на фустанот.

Скјапарели

Невестите што повеќе го практикуваат и сакаат машкиот стил, веројатно ќе бидат пријатно изненадени од креацијата на Скјапарели. Сепак, велот е задолжителен елемент, со кој се нагласува женскиот елемент и посебниот ден.