Кежаровски осуден на четири и пол години затвор

Негодување и солзи ја преполнија судницата во кривичниот суд откако беа изречени затворските казни за случајот Ликвидација во кој новинарот Томислав Кежаровски доби 4 и пол години затвор зошто го открил идентитетот на заштитетиот сведок во случајот Ореше.

Најблиските судницата ја напуштија револтирани од пресудата.

Вознемиреноста Кежаровски ја покажа кога судот одби да му го укине притворот до прависилноста на пресудата. Не можам повеќе да издржам, условите во притворот се ужасни – рече Кежаровски. Судот одлучи да им го укине притворот на тројца од обвинетите кои заработија по година и година и пол затворска казна. Адвокатот на Кежаровски не го коментираше епилогот на судскиот процес. 

За одбраната на дел од обвинетите неукинувањето на притворот како и изречените казни се неприфатливи, а на медиумите им ги пренесоа и зборовите на Кежаровски.

Затворски казни добија и другите седум обвинети. Првообвинетиот Илија Танев, судија од велешкиот суд доби 2,5 години – за примање поткуп и злоупотреба на службената положба. Највисока казна од 5 и пол години доби истражниот судија во „Ореше“ Валентин Зафиров – неовластено оддавал информации и податоци за сведоците. 

4 и пол години доби и обвинителот Ивица Ефремов – ја злоупотребил службената положба. Останатите четворица обвинети, Сабедин Џини Хофман, поранешниот судија Борис Николовски, Сашко Лазаров и Јане Павловски добија казни од една, и една и пол година затвор.

Додека кривичниот суд ги изрекуваше казните за судиите, адвокатите, обвинителот кои го работеа случајот со платеното убиство, а за кој Томислав Кежаровски известуваше, во соседната зграда апелациониот суд повторно го отвори досието Ореше.

По пресудите во кривичниот суд, Кежаровски се врати во Шутка заедно со уште тројца за кои судот реши да не го укине притворот.

Специјалци го спречија новинарскиот протест

Ќе расте цената на регистрацијата кај постарите возила