Триумф на Бондаренко, бронза за Бекриќ

Украинецот Богдан Бондаренко ја круниса одличната сезона во скок во височина со златен медал на Светското првенство во Москва.

Во финалето Бондаренко прескокна 241см што е нов рекорд на шампионатите. Откако го обезбеди златниот медал се обиде да го сруши светскиот рекорд на Хавиер Сотомајор од 245см, подигнувајќи ја летвичката на 246см, но не успеа.

Сребрениот медал го освои Мутаз Еса Баршим од Катар со скок од 238см, а бронзата ја освои Дерек Друин од Канада со иста височина, но послаба серија.

Во трката на 400 метри со пречки, Џехју Гордон од Тринидад и Тобаго стана светски првак со време од 47,69 секунди. Втор беше Американецот Мајкл Тинсли, а изненадување направи Србинот Емир Бекриќ, кој беше единствениот европски атлетичар во финалната трка и стигна до бронзата со време од 48,05 секунди.

Во истата дисциплина кај жените славеше Зузана Хејнова од Чешка со време од 52,83 секунди.

До третата титула по ред на Светските првенства стигна Кениецот Езекил Кембои кој триумфира на 3.000 метри со пречки.

Катерин Ибаргуен од Колумбија со најдобар резултат сезонава од 14,85 метри славеше во трискок.

На 1.500 метри во женска конкуренција победи Абеба Аригави од Шведска со време од 4:02,67 минути.