Кавадарци

Во 40-те карневалски поставки со над 1.000 учесници, од кои поголем акцент се стави на бербата на грозјето и производството на вино, како белег на карневалот, учествуваат ученици од основните и средните училишта во градот, граѓани на Кавадарци, како и гости од Струмичкиот и Прилепскиот карневал, морнарите од Макарска и танчерските групи од Бјелина, Република Српска.

Вистински овации пред присутните предизвика настапот на бразилската танчарска група „Егзотико денс“.

Над 15 илјади посетители синоќа беа во Кавадарци, од кои над 5.000 дојдоа да го следат концертот на Бајага и инструкторите.

Носител на активностите беше Домот на културата „Иван Мазов Климе“, а организатор општина Кавадарци.

На карневалот присутни беа и министерот за земјоделство Љупчо Димовски, неговиот заменик Зоран Коњановски, германскиот и австрискиот амбасадор  во Македонија, пратеници и градоначалници.

Во рамки на манифестацијата во малиот парк кај полициската станица, винарските визби ги презентираа своите производи пред посетителите. Се точеа со тони вино и ракија, а се продаваа и традиционалните производи од грозје, слатко, маџун и мармелад.

Кралот и кралицата на „Тиквешкиот гроздобер“, Драган Јовановски и Славица Барамачев и боговите наздравија за богат гроздобер, за многу род и пари за лозарите.

Не изостана и симболичното откинување на гроздот од страна на градоначалникот на Кавадарци, со што се означи стартот на бербата на грозјето.