Скоро половина од абортусите кои се извршуваат ширум светот не се медицински безбедни за жените, а поголемиот дел од нив се извршуваат во земјите во развој - потврдило едно ново истражување на институтот Guttmacher и светската здравствена организација.

Глобалната стапка на абортуси, во периодот од 2003 до 2008 година, е околу 28 абортуси на 1000 жени кои биле на возраст од 15 до 44 години, што е пад во однос на извршени абортуси до 1995 година - пренесува Time Healthland.

Околу 47.000 жени умреле поради последици од небезбеден абортус, а поголемиот број од нив се случиле во земјите кадешто нема контрацепциски програми и сексуална едукација на младите.

„Абортусот е всушност едноставен и безбеден хируршки зафат, а сите смртни последици лесно можат да се избегнат“ - смета водителката на истражувањето, Гилда Седгх.

Таа и нејзиниот научен тим истражиле статистички податоци од 1995 до 2008 година, а ги опфатиле и официјалните податоци од државите, националните анкети и извештаите од болниците, додека за нелегалните абортуси се служеле со анкети меѓу жените и проценките на експертите.

Стапката на абортуси е најниска во земјите од Западна Европа, каде што една од 1000 жени прави абортус, а најголема е во Источна Европа каде што дури 43 од 1000 жени се решаваат за абортус. Вкупните бројки велат дека околу 30% од бременостите во Европа завршуваат со абортус.

„Постои силна врска меѓу повисоката стапка на абортус и земјите во кои абортусот е забранет, како што е случајот во Латинска Америка и Африка“ - додава Седгх.

Авторите на истражувањето ги сметаат како небезбедни сите абортуси кои се извршени нестручно и без вистинско медицинско знаење кое се придржува на медицинските стандарди. Експертите сметаат дека денешната стапка на абортуси може драстично да се намали доколку подобра контрацепција е подостапна во семјите во развој.