Најубавите стихови во Библијата

АПОСТОЛ ПАВЛЕ ДОБИВА ПОВИК ОД МАКЕДОНИЈА


Дела Апостолски 16

6 Тие поминаа низ Фригиската и Галатската земја, зашто Светиот Дух им забрани да го проповедаат словото во Азија.
7 А кога дојдоа спроти Мисија, се обидоа да отидат во Битинија, но Исусовиот Дух не им дозволи.
8 И така, поминаа низ Мисија и слегоа во Троја.
9 И на Павле му се јави во ноќта видение: еден Македонец застана пред него и го молеше, велејќи: “Дојди во Македонија и помогни ни!”
10 По тоа негово видение, веднаш побаравме да отидеме во Македонија, бидеки разбравме дека Господ не повикал таму да го проповедаме Евангелието.

ИСУС НАХРАНУВА ПЕТ ИЛЈАДИ ДУШИ

Евангелието според Лука 9

12 А кога денот почна да превалува, Дванаесетте Му пристапија и Му рекоа: „Отпушти го народот да оди во околните села и куќи, за да најде преноќиште и јадење, зашто сме тука во пусто место!”
13 Тој пак им рече: „Дајте им вие да јадат!” А тие рекоа: „Немаме повеќе од пет леба и две риби; освен ние да отидеме и да купиме храна за сиот овој народ!”
14 Зашто беа околу пет илјади мажи. И им рече на Своите ученици: „Седнете ги во купчиња по педесет!”
15 И така направија и ги седнаа сите.
16 Тој ги зеде петте лебови и двете риби, погледна кон небото; ги благослови и ги раскрши и им даваше на учениците, за да ги стават пред народот.
17 И сите јадеа и се наситија, и го кренаа тоа што остана од парчињата - дванаесет кошници.

ПОСЛЕДНИОТ СУД


Матеја 25


31 ”Кога Човечкиот Син ќе дојде во Својата слава и сите ангели со Него, тогаш ќе седне на престолот на Својата слава;
32 и ќе се соберат пред Него сите народи, а Тој ќе ги оддели едни од други, како што пастирот ги одделува овците од јарците.
33 И ќе ги постави овците од својата десна страна, а јарците од левата.
34 Тогаш Царот ќе им рече на оние од десната страна: ‘Дојдете, благословени од Мојот Татко, и примете го во наследство Царството, кое ви е приготвено од создавањето на светот!
35 Зашто огладнев и Ми дадовте да јадам; ожеднев и Ме напоивте; бев странец и Ме примивте;
36 бев гол и Ме облековте; бев болен и Ме посетивте; бев во темница и дојдовте при Мене.’
37 Тогаш праведниците ќе Му одговорат и речат: ‘Господи, кога Те видовме гладен и Те нахранивме; или жеден и Те напоивме?
38 Кога Те видовме како странец и Те примивме? Или гол и Те облековме?
39 Кога те видовме болен или во темница и дојдовме при Тебе?
40 А Царот ќе им одговори: ‘Вистина ви велам, доколку му направивте на еден од овие Мои најмали браќа, Мене Ми направивте.’
41 Тогаш ќе им рече и на оние од левата страна: ‘Одете си од Мене, проклети, во вечниот оган, приготвен за ѓаволот и за неговите ангели!
42 Зашто огладнев и не ми дадовте да јадам; ожеднев и не Ми дадовте да пијам,
43 бев странец и не Ме примивте; бев гол и не Ме облековте; бев болен и во темница и не Ме посетивте.’
44 Тогаш тие ќе одговорат и речат: ‘Господи, кога Те видовме гладен, или жеден или како странец, или гол или болен или во темница, и не Те послуживме?’
45 Тогаш ќе им одговори: ‘Вистина ви велам, доколку не му направивте на еден од овие најмали, ни Мене не Ми направивте!’
46 И овие ќе отидат во вечна мака, а праведниците во вечен живот.”

БЛАГОСЛОВУВАЈТЕ ГО ГОСПОДА

Псалм

28:6 Благословен да е Господ, зашто го послуша гласот на моите молитви!
31:21 Благословен да е Господ, зашто ми ја јави својата чудесна милост.
41:13 Благословен да е Господ, Израелевиот Бог, од века до век! Така нека биде! Амин!
66:20 Благословен да е Бог, Кој не ми ја одби молитвата, Кој не ја отстрани од мене Својата милост.
68:9 Боже, Ти испрати благословен дожд на Своето наследство, го зајакна кога беше уморно.
68:19 Благословен да е Бог од ден на ден, Бог нè носи, нашиот Спасител.
68:35 Страшен е Бог од Своето Светилиште. Израелевиот Бог му дава моќ и сила на Својот народ. Благословен да е Бог!
72:18 Благословен да е Господ, Израелевиот Бог, Кој единствен твори чудеса!
89:52 Благословен да е Господ довека! Нека биде така. Амин.
106:48 Благословен да е Господ, Израелевиот Бог, одвека довека! И сиот народ нека рече: „Амин! Алилуја!”
118:26 Благословен, кој доаѓа во Господово име, ве благословуваме од Господовиот дом.
119:12 Благословен си, о Господи, научи ме на Своите повелби.

„Вие сте светлината на светот. Не може да се сокрие град што се наоѓа на врв планина. Ниту пак светило се пали и клава под поклоп, туку на свеќник и им свети на сите в куќи. Така треба да свети пред луѓето и вашата светлина, за да ги видат вашите добри дела и да Го прослават вашиот Отец небесен...” (Мат. 5; 14 – 19)

„Кој ќе најде добродетелна жена? Таа вреди повеќе од бисери.
Мажовото срце се надева во неа, и не ќе му недостига печалба.
Таа му прави добро, а не зло, во сите дни на својот век.“ (Пословици, 31:10-12)

Не ве наречувам веќе слуги; зашто слугата не знае што прави неговиот господар;
а вас ве нареков пријатели, зашто ви соопштив сè што чув од Мојот Татко.

Ев. Јован 15:15

2ТИМОТЕЈ
Глава 4

1 Те заколнувам пред Бога и Христа Исуса, Кој е готов да им суди на живите и мртвите, со Неговото јавување и Неговото Царство:
2 проповедај го словото, настојувај во време и во невреме, изобличувај, прекорувај, охрабрувај со сета трпеливост и со поука.
3 Зашто ќе дојде време, кога луѓето не ќе ја трпат здравата наука, туку според своите страсти ќе си насоберат учители,за да им ги скокоткаат ушите,
4 и ќе ги одвратат ушите од вистината, а ќе се свртат кон бајки.
5 А ти биди трезвен во сè, трпи го страдањето, врши ја работата на евангелист, исполнувај ја својата служба до крај.
6 Зашто јас веќе сум излеан како жртва налевница, и времето на моето заминување настапи.
7 Извојував добра борба, го завршив трчањето, ја запазив верата.
8 Отсега натаму ми е подготвен венецот на правдата, што ќе ми го даде во оној Ден Господ, Праведниот Судија, и не само мене, туку и на сите, кои го возљубија Неговото јавување.