Темната љубов на хомосексуалците

Министерот Спире Ристовски разбуди прилично гнев, делејќи го општеството на здрави и болни. Така изгледа тажниот свет на еден министер... Пишува Биљана СЕКУЛОВСКА

Пред неколку години е напишана една фина, тажна книга "Лорка и светот на хомосексуалците", посветена на еден од најголемите поети и драматурзи, убиен од фашистите на Франко. Убиството морало да се случи од две причини, тврди авторот Ијан Гибсон: една е сексуалната ориентација на Лорка, со која Шпанија во тоа време не можела да се помири, а другата причина секако дека била политичка, со оглед на левичарството на уметникот. Во оној момент кога биле стрелан Лорка, еден од војниците изјавил дека куршумите ги истрелал кон неговиот задник. Гордоста на режимот на Франко секако дека почивала на таквите војници.
Во книгата, навистина, нема ништо тажно, освен фактот дека крајот морал да дојде, Лорка морало да биде убиен затоа што бил презиран, омразен поради хомосексуалноста. Таа ориентација на Лорка секогаш важела само како непотврдени гласини, никогаш докажана, секогаш шепотена, сега од писателот Гибсон темелно истражена - тој скоро четириесет години $ посветил на оваа книга. На Гибсон во времето на диктаторот Франко му била забранета една друга книга "Атентатот на Федерико Гарсија Лорка", со која ја решава мистеријата за неговото убиството. Забраната траела сe до смртта на Франко, иако претходно ја добила наградата на меѓународниот печат. Една друга книга, но оваа на Лорка, исто така, била забранета во тоа време, поради тоа што била прилично хомоеротична, неговото семејство долго молчело, за подоцна насловот да биде променет: од интригантниот наслов "Сонети на темната љубов", станале конвенционални, без трошка фантазија, "Љубовни сонети". Љубовта за Лорка значела и опсесија, а една од тие негови фиксации бил Салвадор Дали и тука почивала темната страна на љубовта - ексцентричниот Дали одбивал воопшто да биде допрен. Така изгледал светот во времето на Франко.
Во Македонија, еден министер разбуди прилично гнев, делејќи го општеството на здрави и болни: оние кои се здрави билошки се репродуцираат и се вредни за основање брак (и само во таквиот брак децата се здрави во секоја смисла), останатите (оние кои со помош на напредокот на медицината родиле деца, оние кои се самохрани мајки или оние што посвојуваат деца), едноставно се болни. Министерот за труд и социјала Спире Ристовски даваше изјави без воопшто да постои барање за основање брак од хомосексуалните заедници, и еден од борците за права на маргинализираните групи Кочо Андоновски одлично објасни: "Важно е да се мразиме". Тогаш кога СДСМ излезе со став за оваа (измислена од ВМРО) тема и одлучно кажа дека се, исто така, против истополни бракови, уште еден борец за правата излезе - Славчо Димитров поентираше: "Мора да го добијат тоа за некој глас на изборите".
Денеска во Шпанија се дозволуваат геј бракови. Затоа што тажниот живот и смртта на Лорка никогаш не смее да се повторат.