Македонија нуди најниски трошоци за правење на бизнис во Европа, истакна премиерот Никола Груевски во интервју за највлијателната канадска бизнис-телевизија БНН. Груевски во интервјуто се задржа на економската ситуација во Европа во контекст на европската должничка криза, придобивките и предностите на компаниите кои ги нуди државата и перспективите на државата во ЕУ и НАТО интегративните процеси. Претседателот на македонската Влада посочи дека Македонија како земја која има договор за слободна трговија со цела Европа, нуди пазар од 600 милиони жители каде што може да се извезува без царински давачки.
- Овде, во Канада, се сретнавме со многу бизнисмени. Само што дојдов од бизнис-форумот овде во Торонто и ден претходно во Монтреал. Разговараме со бизнисмените за можностите за бизнис и инвестирање во Македонија. Разговараме за тоа што ние нудиме. Македонија има договор за слободна трговија со сите земји во Европа. Се што некој произведува во Македонија, може да биде извезено во ЕУ без царински давачки и од Македонија може да биде покриен пазар од 600 милиони луѓе. Друга важна работа што Македонија ја нуди се најниски трошоци за водење бизнис, не само даноци, туку се останато. Не постои земја во Европа што нуди пониски трошоци за водење бизнис, рече Груевски.

Во интервјуто за канадската телевизија Груевски беше најавен како премиер на Република Македонија. Тој го повтори својот став - делиме исти вредности со Западна Европа и затоа сакаме да сме таму.
- Генерално, наша стратешка цел е да се придружиме на ЕУ, пред се бидејќи цел регион каде што е Македонија, Балканскиот Полуостров, се движи кон ЕУ. Добро е тоа што се случува, бидејќи ЕУ има подобри стандарди што ние ги имплементираме и ги воведуваме во нашата земја и нашиот регион. На пример, има голема поддршка од фондовите на ЕУ за земјите што се приклучуваат на ЕУ. Има многу причини - ние ги делиме истите вредности со Западна Европа и тоа е една од причините зошто ние сакаме да сме таму