Македонските олимпијци Марко Блажевски, Симона Маринова (пливање), Кристијан Ефремов и Христина Ристеска (атлетика) продефилираа на Олимпискиот стадион во Лондон, на свеченото отворање на Летните олимписки игри (ЛОИ) во Лондон, заедно со неколку илјади други спортисти од целиот свет.

Македонија продефилира 65-та меѓу 205-те земји што ќе настапат на најголемиот светски спортски собир. Младиот 19-годишен пливач Блажевски ја доби честа да биде македонски знаменосец на церемонијата на свеченото отворање на ЛОИ, а веќе утре тој ќе биде првиот Македонец што ќе има свој настап, и тоа во квалификациите во трката на 400 метри мешано.

За Македонија ова е петти настап на Олимписки игри како самостојна држава, односно шести ако се смета и учеството на ЛОИ во 1992 година во Барселона под знамето на Интернационалниот олимписки комитет (ИОК).

Во првата квалификациска трка, инаку најслаба по квалитет, Марко Блажевски го освои третото место од пет пливачи, остави двајца зад себе, а конечниот пласман ќе го дознае откако ќе завршат сите квалификациски трки. Очигледно дека Марко Блажевски се замори од носењето на македонското знаме на синоќешното свечено отворање на Игрите, па потфрли во она за што и дојде на ЛОИ, да исплива свој најдобар резултат.

Остана само пуста желба на Марко Блажевски да го урне македонскиот рекорд во оваа дисциплина, што го држи Александар Маленко, а изнесува 4:27.62 минути.