Англичанец има дресови од 194 репрезентации

Ник Ворик (26) од англиското гратче Петерборо, покрај тоа што е наставник по математика, е страствен колекционер на дресови. Досега има дресови на дури 194 фудбалски репрезентации, а му недостасуваат уште 15 за комплетирање на колекцијата од сите земји членки на ФИФА. 

Првиот го купил пред две години, се разбира оној на селекцијата на Англија, и оттогаш потрошил 25.000 евра. Најскапо го платил дресот на Сао Томе и Принципе, националниот тим од малиот архипелаг во близина на африканскиот брег, за што издвоил 300 евра, а како што открива за "Дејли стар" најтешко го набавил дресот на репрезентацијата на Уганда за што признава дека најмногу му се допаѓа. Во потрага е по уште 15 дресови меѓу кои на репрезентациите на Еритреја, Либија, Јемен, Сирија и Конго. Планира и тие да ги набави до крајот на оваа година, да ја заврши својата колекција и потоа да организира изложба со сите 209 дресови.