ЧЕТВРТОК, 07 ЈУНИ 2012 20:30

МАКЕДОНИЈА

Народот се крева на протести, против арачот кој го собира УЈП по македонските градови и села. Прилепските дуќанџии од утре во 9 часот почнуваат со протести пред канцелариите на УЈП во Прилеп.

Утре чаршијата нема да работи, стои на плакатите залепени низ целиот град.

"Време е за самозаштита од прекумерното и нечковечко однесување од страна на УЈП, време е да го кренеме нашиот глас затоа што ние имаме семејства и сакаме чесно и поштено да си го заработиме својот леб. Да кажеме стоп за лудилото на УЈП, да престане!", се вели во известувањето на прилепските дуќанџии.

- УЈП, наместо да прочешла онаму каде што не се плаќа никаков данок, односно во западна Македонија, тие доаѓаат тука каде што народот е мирен и знаат дека нема да им се спротистави, но до кога мисли ВМРО-ДПМНЕ дека овој гладен народ е молчалив, велат револтираните пазарџии од Прилеп.

- Загрижени сме, нема пари, приходи од никаде, прометот ни е намален, цел бизнис е задушен - а овие од власта ни собираат пари за да градат камења и врби низ Скопје, вели еснафски дуќанџија од Прилеп.

- Ова е беда и сиромаштија, вака не било, велат граѓаните.

Во Прилеп, евидентен е револтот на граѓаните поради тоа што власта само им ги зема парите, а не им враќа ниту денар.

Оставен е само пустош, патиштата се со дупки и уништени, во време кога во Скопје се фрлени повеќе стотици милиони евра на еден километар квадратен, и тоа само за бронза и врби.

И додека под силен удар на инспекциските служби се само градовите од Источна и Јужна Македонија, на западот ништо ново. Таму полиција и инспекција не смее да пипне, а камо ли да напише казна или да затвори некој бизнис велат познавачите.

За само два месеци во Битола и Прилеп, инспекциските служби затвориле неколку стотици бизниси, каде без работа останале илјадници битолчани, прилепчани, ресенчани.