Евросонг 2012

ПО 57. ПАТ

Денеска почнува Евровизија

Вечерва Црна Гора и нејзиниот претставник Рамбо Амадеус во 21 часот по централно европско време ќе го означат стартот на 57. по ред Евровизија. Во Азербејџан се е подготвено за старт на ова музичко натпреварување на кое ќе учествуваат 42 земји, таму се изведувачите и делегациите и трпеливо ги чекаат своите три минути на големата сцена во Кристалната сала во Баку. Нашата Калиопи ќе пее "Црно и бело" во втората полуфинална вечер и тоа втора по ред, а пред неа ќе настапи српскиот претставник Жељко Јоксимовиќ со "Није љубав ствар". Калиопи ќе пее на македонски јазик и со песната дело на Ромео Грил ќе се обиде да ја внесе Македонија во големото финале закажано за в сабота кога ќе се знае која песна ќе победи и која земја ќе биде следен домаќин. Ова е најскапото европско музичко шоу досега со рекорден буџет од 50 милиони евра и сите очекуваат ова да биде најспектакуларното издание досега.

Гласењето е 50-50 што значи дека е подеднакво поделено меѓу телевоутингот и стручното жири. Најдобрите десет песни од двете полуфинални вечери одат во големото финале в сабота, каде директен пласман имаат земјите од големата петорка Италија, Шпанија, Германија, Велика Британија, Франција и Азербејџан како земја-домаќин.
(А. Ѓ.)

ОБЛОЖУВАЛНИЦИ
Шведска и песната "Еуфорија" е апсолутен фаворит на обложувалниците годинава, потоа следуваат Русија, Италија, Велика Британија, додека петта е Србија и со тоа најдобро котира од сите од балкански држави. Македонија е на самото дното според коефициентот, односно трета од позади, од вкупно 42 земји-учеснички. На дното на табелата друштво ни прават Црна Гора, Сан Марино, Бугарија, Албанија, Малта, Португалија, Грузија се последни на табелата.

Последните пет евровизиски победници во Баку
Последните пет евровизиски победници од изминатите пет години ќе се качат на сцената во Баку, да ги изведат песните со кои ја освоија оваа престижна европска музичка награда. Лена, Александар Рибак, Дима Билан, Марија Шерифовиќ и минатогодишните победници Ели и Ник ќе бидат дел од ревијалната евровизиска програма.

Прво полуфинале

Второ полуфинале

Земји кои директно се пласираат во финалето