Македонскиот ракометен „снајперист“ Кирил Лазаров доби посебно внимание во шпанскиот спортски весник „Марка“.

Весникот се задржа на неговиот настап и лидерство во македонскиот тим на Европското првенство во Србија. Лазаров инаку е член на Атлетико Мадрид.

Можеби нема да обезбедат учество во полуфиналето на ова Европско првенство, како што тоа го направија македонските кошаркари, но селекцијата на Македонија е најзабавниот тим на ова првенство, пишува Марка.

Од весникот посочуваат дека, ракометарите немаат натурализиран играч како Лестер Бо Мекејлеб, но Лазаров е еднакво стрелачки расположен како него.

Балканскиот тим, еден од четирите тима од поранешна Југославија, е прифатен од илјадници ентузијасти сонародници, кои со национални знамиња и облечени како фалангата на Александар Македонски ги гледаат секаде каде што играат.

Секој меч изгледа како битка против персиската војска, а Лазаров е лидерот на македонската коњаница.

Лазаров е најдобар стрелец на ЕП, со речиси една третина од вкупниот број погодоци на тимот, што е висок сооднос во однос на минутите поминати во игра, но и специфична тежина на играчот на Атлетико во својата репрезентација. Ако има тесна завршница, нема сомнение дека Лазаров ќе игра.

Тој го постигна последниот гол со Шведска. Неговиот удар беше последен со Германија, кој беше под посебна лупа, поради жалбата на македонската федерација. И против Данска последниот шут беше негов, но го сопре Ландин, а Линдберг погоди со звукот на сирената. Пет од последните шест гола ги даде од својата позиција. На крајот заврши со 13 погодоци.

Македонија сите мечеви ги одигра до крај, испушти три бода во последните секунди. Да ги имаше, сега ќе беше веќе во полуфинале, или барем со едната нога во него.

„Изгледа дека немаме среќа на овој турнир“, ќе рече разочараниот Лазаров, ракометниот Мекејлеб на турнирот.

http://www.marca.com/2012/01/21/balonmano/1327184192.html

http://kurir.mk/sport/rakomet/58301-Marka-Lazarov-e-rakometniot-Mekeleb