Лакирани vs. велур

Лакираните чевли се огромен хит, но исто така актуелни се и обувките од велур. Што и да изберете, мат или блескав изглед, ќе бидете во чекор со последните трендови.

Женствен приказ на машкоста

Неколку сезони дизајнерите експериментираат на границата помеѓу машкоста и женственоста и како резултат на тоа чевлите во машки стил станаа примамливи и задолжителни за секоја модна зависничка. Оксфордките се одличен избор доколку сакате да го следите овој тренд.

Гломазни и откачени

Трендовите оваа сезона ќе ве однесат во екстремности, т.е. нема да погрешите ниту ако изберете елегантни чевли во минималистички стил, ниту ако изберете нешто откачено, неочекувано и гломазно. Големата дебела штикла, големата платформа или воочливите детали на самите обувки ќе ве издвојат од топлата.

Тенка штикла

Тенката штикла е ултра модерна оваа есен и зима. Можеби не изгледа многу практично, но зрачи со елеганција, еротичност и сексапил.

Блескави и неодоливи

Светликавите чевли изгледаат смело и гламурозно, па можеби тоа е и причината што дизајнерите посакаа да ги вратат на модната сцена. Сепак, овие обувки си имаат и негативна страна затоа што треба да внимавате со што ги комбинирате. Премногу блескав аутфит не е воопшто пријатен за очите.

Инспирација од баба

Чевлите кои обично ги нарекуваме старовремски и кои можете да ги најдете во шкафчето на баба прават мал кам-бек. Добрата страна кај нив е што се многу удобни и се одлично дополнување на секојдневниот изглед за на работа.

Врвки vs. ремчиња

Обувките со врвки се интересен тренд кој го обожаваат оние што знаат да се забавуваат со својот стил. Ремчињата пак се погодни за да се избегне минималистичкиот стил и да се разнообрази изгледот.

Ремче на глуждот

Вашата колекција обувки не би била комплетна без еден пар обувки на платформа со ремче на глуждот. Овие обувки многу наликуваат на чевлите тип „Мери Џејн“, но имаат свој современ шмек.

Најпознатиот дизајнер на чевли, Маноло Бланик, секогаш им нуди нешто возбудливо и интересно на своите обожавателки ширум светот. Затоа, не постои жена која не сонува да носи чевли создадени од неговиот генијален ум.

Секоја негова колекција носи нешто свежо и ново, а сепак изгледа класично и вечно убаво. Ако сè уште не сте ги виделе најновите креации на модниот гениј Бланик, не пропуштајте сега да ги видите прекрасните чевли, во кои нема како, а да не се вљубите.

Со понудените фотографии ви нудиме шанса да оцените дали изјавата на Мадона за чевлите на Бланик е точна. Подолу се дадени двете најактуелни колекции на големиот дизајнер.

Гаетано Пероне е еден од најистакнатите дизајнери на обувки во модната индустрија. Неговото име се поврзува со брендови како Антонио Берарди, Салваторе Ферагамо и Кристијан Диор.

Но, ако ја погледнете неговата колекција за сезоната есен/зима 2011, веднаш ќе го препознаете влијанието на уникатниот стил на Александар МекКвин.

Новата колекција е егзотична и луксузна, а секоја обувка има мали детали кои ја прават уникатна. Перја, змиска кожа, сатен, велур... внимателно избраните материјали во комбинација со боите на скапоцени камења создаваат хармонија која може да ја освои и најпребирливата жена.

Кога на 11 години Џими Чу го создал првиот пар чевли, сигурно не претпоставувал колку значајно ќе стане неговото име во светот на модата. Денес, брендот Џими Чу е синоним за луксузни обувки кои секоја жена посакува да ги има.

Проектот „Кристал“

Компанијата Џими Чу ја прославува својата 15-годишнина. Имајќи во предвид дека традиционалниот подарок за 15-тата годишнина е кристалот, компанијата создаде „кристална“ колекција на вечерни обувки.

„За да ја прославиме нашата 15-годишнина, сакав да создадам модерен гламур, кој е доказ за стилот и имагинацијата на Џиму Чу“ – изјавила Тамара Мелон, соосновач на компанијата.

Проектот „Кристал“ вклучува луксузни блескави обувки кои веќе се хит меѓу холивудските ѕвезди. Но, моделите од гламурозната колекција доаѓаат со етикети со цени од 425 до 1995 евра, па ние можеме само да си ги исплакнеме очите.