Енергетски центри-ЧАКРИ

Пред многу години, кога само што започнав да вежбам јога (околу два месеца) при лотосова позиција и вежбање на дишење со дијафрагма, ми се случи она што го нарекуваат почеток на будење на кундалини. Го доживеав токму она што е претставено на многу слики на кои се претставуваат чакрите, а тоа е качување на онаа „змија“ и нејзино обвиткување околу чакрите, почнувајќи од врвовите на стапалата, па качувајќи се нагоре се до темето на главата. Ова качување и обвиткување околу чакрите беше пропратено со волшебен кристален звук.

Откако се вратив вечерта дома, ги изгасив светлата и легнав да спијам, одеднаш во мене се појави светлина. Помислив дека некој упалил светло, па ги отворив очите и видов дека околу мене е потполна темница. Повторно ги затворив очите и повторно во мене имаше светлина. Пак ги отворив очите, надвор беше темно.

Се препаднав од страв. Најстрашно беше што мојата инструкторка по јога немаше доживеано вакви нешта и не можеше да ми даде никаков совет. По ова прекинав со сериозно вежбање јога.

Дефинитивно во овие работи треба да се впуштите само ако имате добар учител кој сето тоа го поминал и кој ќе може навистина да ве води.

Бидејќи од лично искуство знам дека чакрите постојат, за мене врв во езотеричната литература се латаифите кои се наоѓаат во енергетскиот центар (чакра) на срцето. Дервишите наведуваат шест латаифи, од која секоја е поврзана со одреден светец, а една од нив е поврзана со Исус Христ. Последната од нив е поврзана со Мухамед.
Дефинитивно нешто што би сакала да го искусам, но само со добар учител.

   

Кога ова ми се случи појма немав што се тоа кундалини .

Инаку поради ова искуство знам дека зборот „просветлен“ навистина искуствено содржи светлина.