Две нешта се сосема сигурни. Првата е дека секоја жена потајно посакува да поседува барем еден пар чевли од познатиот бренд Miu Miu. Втората која е уште посигурна е дека моделите од оваа сезона дефинитивно не може да се носат секаде и со секаква облека, туку исклучиво со парчиња кои дозволуваат овие чевли да блеснат во сиот свој сјај.

Креативниот тим на Мiu Miu создаде неколку импресивни креации кои кај модните критичари поминаа толку добро што веќе ги прогласија за своевиден must have.

Сепак, имајте предвид дека овие модели со откачена потпетица се приказна сама за себе, па можеби поради својот специфичен изглед нема да му се допаднат на секому.

 

До пред некое време потпетиците беа резервирани само за жени, но по се изгледа дека на повидок е нова ера на ексцентричност и кршење на модните правила.

Во седумдесеттите модниот свет направи своевиден пресврт со машки чевли на блага платформа кои за кратко станаа хит, но не успеаја подолго да го задржат интересот кај мажите ширум светот.

Можеби Џон Траволта во „Треска на саботната вечер“ чекореше на неколку сантиметри над земјата, но тоа не беше доволно добро за просечните мажи кои сепак преферираа нешто што изгледа мажествено.

Сега доаѓа тренд кој е далеку поекстравагантен и наложува носење на високи потпетици кои се удобно сместени на машките нозе, а се сон и завист на секоја жена. Сепак, што е она што ги мотивира мажите да носат чевли на платформа со вртоглава потпетица? Најчестиот одговор на ова прашање е моќта.

 Едноставно им се допаѓа чувството да бидат повисоки од она што навистина се. Жените имаат огромен избор кога станува збор за чевлите кои што ги носат, а мажите секогаш се ограничени во тој поглед. Токму затоа некои од нив сакаат да го разиграат својот стил и да испробаат нешто ново. Кога тоа не беше проблем за фамозниот француски крал Луј 14 и тоа пред стотици години, зошто да биде за обичните мажи на 21-от век.