Осумнаесетгодишниот Предраг Груевски од Битола веќе две години ја претставува Македонија на меѓународните олимпијади по информатика, а неколку години се натпреварува и во математика. Годинава се закити со два бронзени медала и тоа на Светската информатичка олимпијада во Тајланд и на Балканската во Романија. Знаењето стекнато во средното училиште ќе го надградува на светски познатиот Институт за технологија во Масачусетс.

- Искрено мислам дека да немав награди на Олимпијадата немаше да бидам примен на еден таков престижен факултет. МИТ е во моментов најдобар за информатички технологии и прв на светските ранг листи и мислам дека немаше да успеам да аплицирам, а и не и да бидам пример со скоро целосна стипендија ако немав ваков успех, вели Предраг Груевски.

И  неговиот сограѓанин Христијан Богоевски има слични амбиции. Вели дека дневно минува и по 10 часа работејќи на комјутер, а медалот на Светската олимпијада е признание за наученото.

- Три години одам на натпревар по информатика, три години на светски, оваа година првпат освоив бронза, прв медал ми е и се надевам дека ќе успеам да влезам на некој од најпрестижните универзитети во светот, вели Христијан Богоевски.

Македонските репрезентативци по информатика годинава се побогати за 8 бронзени медали кои ги освоиле на Балканската олимпијада за средношколци, јуниорската балканска и светската олимпијада. Од натпреварувањето во Тајланд средношколците се враќаат и со две специјални пофалници за постигнатите резултати. Од Здружението на
информатичарите се надеваат дека со промените во наставните програми ќе успеат да го доближат програмирањето до сите ученици.

- Веќе од следната година ќе има измени во програмата за прва година средно образование и сите ученици во средните ќе изучуваат околу 50 проценти програмирање во рамки на предметот информатика.  На тој начин сите ученици ќе бидат во можност да се запознаат со тоа што навистина е информатиката, која е сржта и ќе може да видат дали се интересираат за таа област и да продолжат да работат во таа област, објаснува Миле Јованов, претседател на Здружение на инфоматичари.

Најуспешните информатичари ќе бидат наградени и од Факултетот за информатички науки и компјутерско инженерство. Поради постигнатите успеси на меѓународните натпревари, факултетот им додели целосна стипендија за студирање на учениците, а бесплатни студии ќе имаат и добитниците на прва, втора и трета награда на државно ниво.