Подготвени сме за решение за името

Вевчани, 21 август 2011 (МИА) - Државата е подготвена да се најде решение за спорот со името. Тоа е наш интерес и ние сакаме решение, изјави денеска премиерот Никола Груевски одговарајќи на новинарско прашање по посетата на Вевчани.

Прашан за изјавата на лидерот на ДУИ Али Ахмети на Конференцијата посветена на Рамковниот договор дека можеби е време меѓународната заедница поактивно да се вклучи во менаџирање на проблемот, Груевски рече дека тоа не е само во последно време и оти постојано доаѓаат такви сугестии.

- Учесници сме во сите комуникации и контакти под покровителство на ОН и ние сакаме што поинтензивно да се најде решение затоа што тоа е од наш интерес, на нашиот народ, на нашите граѓани, на нашата земја. Се разбира, очекуваме Грција да покаже таква волја и се надеваме дека тоа ќе се случи, изјави Груевски.

За тоа дали очекува дијалог со коалицискиот партнер ДУИ во однос на државната политика за името, премиерот Груевски рече оти секако, очекува и за името и за се останато, затоа што, според него, државата им припаѓа на сите граѓани, независно од нивната етничка заедница.

Во однос на процесот на евроинтеграција, шефот на Владата истакна оти е постигнат сериозен прогрес и оти очекува позитивен извештај од ЕК.

- Во голем дел нештата што ни беа предвидени со Програмата и со зацртаниот Акционен план што произлезе од претходниот Извештај, во голем дел се отидени напред. Има сериозен прогрес. Тоа гледам дека го чувствуваат и луѓето од Брисел. Во комуникацијата со нив кога доаѓаат тука ни укажуваат на тоа дека гледаат сериозен прогрес и на она што се уште не е довршено треба да се заврши. Сметам дека има голем прогрес. Тој прогрес беше направен и пред изборите, но и сега во овој период со дополнителна сила, елан и енергија се пристапи кон довршување на оние нешта што пред изборите не беа довршени, рече Груевски.

Тој информира дека Владата имаше специјална седница посветена на европските интеграции и на сите детали поврзани со тоа, а следната недела ќе одржи нова седница на која ќе се зборува само за точките поврзани со зачленување во ЕУ.

- Мислам дека државните институции во најголем дел ќе си ја завршат својата работа и дека ќе имаме извештај во кој ќе има голем прогрес и доста позитивни работи и мислам дека има огромни шанси тој извештај да биде позитивен. Се разбира, тоа не зависи од нас, зависи од тие што го прават. Нашето чувство е врз основа на она што го имаме досега завршено, но и врз основа со контактите што ги имаме со нив дека ќе имаме позитивен извештај затоа што Владата и институциите ги завршија во најголем дел работите, подвлече премиерот Груевски одговарајќи на прашање дали се исполнува евроагендата.