Пофалби и жалби за Македонија

Поставен камен-темелник за изградба на парк со плоштад во општина Аеродром

Во општина Аеродром, на аголот на булеварите „Јане Сандански“ и „Србија“,беше поставен камен-темелник за изградба на нов парк со плоштад насловен „Јане Сандански“.

- Овој парк со плоштад, пешачки патеки, културни и мултимедијални компоненти, езерца со фонтани и водопад, јасно укажува дека визијата за уредени и концепциски добро обмислени катчиња, по примерот на европските и светски метрополи, не е далечна за македонските граѓани. Само треба идеја, волја да се реализира, посветеност и многу работа, рече Груевски.

Тој истакна дека општина Аеродром продолжува да диктира темпо на модернизација и примена на еден, како што рече, високо урбан стил на живеење во Град Скопје. Потсети дека во оваа општина се градат нови станови, училишта, градинки, забавни паркови, хотели, трговски центри, спортски терени, игралишта, паркинзи...

- Верувам дека овој проект ќе биде добар пример и за другите општини во Република Македонија и дека што поскоро ќе имаме повеќе вакви паркови, рече Груевски.

Градоначалникот Коневски информира дека во централниот дел на паркот ќе биде поставен споменик на македонскиот револуционер Јане Сандански, како симбол на населбата што го носи неговото име.

Паркот ќе се простира на околу 4.000 метри квадратни, на 1.600 метри квадратни ќе бидат изградени пешачки патеки, а на 250 метри квадратни ќе бидат изградени три езерца и еден водопад.

- Изградбата на паркот се очекува да заврши кон крајот на летото, кога и официјално ќе биде пуштен во употреба, рече Коневски и додаде оти покрај финансиската конструкција од 27,5 милиони денари, покриена од буџетот на општина Аеродром, проектот за изградбата на паркот „Јане Сандански“ е донација на општина Прилеп.

Градоначалникот Трајановски рече дека во насока на добрата соработка со општина Аеродром и градоначалникот Коневски ќе донираат 100 јавори и 100 јапонски цреши.

Во паркот ќе има архитектонски, партерни и хортикултурно уредени површини, збогатени со бина со плато, клупи, канти за отпадоци и друга урбана опрема.