Прилеп

Прилеп подготвен за старт на пиво - журката

ПРИЛЕП - На ладно пиво и вкусна скара се очекуваат над 300.000 туристи во Прилеп на годинешниот деветти „Пивофест“. Според информациите од локалната самоуправа, која е организатор на манифестацијата, се' е подготвено за почеток на пиво-журката, безбедноста на храната и воопшто, организацијата на целата манифестација ќе биде на највисоко ниво.

„Нека побрзаат гостите од сите градови на Македонија и пошироко да си резервираат место за ноќевање, зашто околу 95% од угостителските капацитети во градот веќе се пополнети, но, сепак, локалната самоуправа за туристите што сакаат да кампуваат им овозможи бесплатен простор на „Могилата на непобедените“, каде што ќе бидат послужени за добре дојде со домаќински чај или кафе“, изјави градоначалникот на Прилеп, Марјан Ристески. Тој се' уште ја држи во тајност сумата што ќе ја платат Општината и пиварниците за гостувањето на врвната естрадна ѕвезда, Здравко Чолиќ, кој треба да има свој целовечерен концерт на завршницата на журката на 17 јули.

А журката ќе започне на 14 јули во центарот на градот, каде што уште сега се монтираат штандовите на вкупно 32 кафанџии и брендирани пиварници, кои ќе нудат не само вкусна храна, туку и добра забава. Пиво-парти, пена-парти се дел од натпреварите и играриите што се' уште се држат во тајност. Годинава е новина тоа што млади момци и девојки облечени во народна носија ќе служат на секој штанд, а музичарот Борче Шабаноски компонираше и химна за оваа манифестација.

За да се задоволат сите вкусови, ќе има многубројни естрадни гости на две сцени во градот, забава за млади и повозрасни со Харис Џиновиќ, Елена Ристеска, Благица Павлоска, Ламбе Алабаковски...познати диџеи што ќе се грижат за забавите во раните утрински часови, а конфекцијата „Васидора“ од Прилеп ќе одржи и модна ревија.

За целосна безбедност и беспрекорна организација, ангажирани се сите инспекциски служби во градот во соработка со прилепската полиција и ТППЕ.

Лани на прилепскиот „Пивофест“ се испија над 240 тони пиво и се изедоа околу 123 тони скара

Испиени 60.000 кригли пиво на првиот ден од "Пивофест"

Околу 29 илјади литри пиво испија и 12 тони скара изедоа гостите во првите два дена од годинашниот фестивал на пивото во Прилеп. Целиот град е окупиран од пивопијци од речиси сите градови од земјава.

Низ чад и силна фолк и рок-музика се густираат десетина видови пиво. Утревечер се очекува градот да го "нападнат" околу 100 илјади посетители, за кога е закажан и концертот на Харис Џиновиќ. Кулминацијата, пак, се очекува за в недела со настапот на балканската поп-легенда Здравко Чолиќ.

Гостите се снаоѓаат кој како знае и умее, па многумина деновиве се на преспивање кај роднини, пријатели, познајници низ прилепските домови. Мирјана Стојаноска вели дека има полна куќа гости.

- Уште зимоска ме "капарија" роднини од Гевгелија и од Скопје за "Пивофестот". Нема кај да ги сместам, но се снаоѓаме некако. Нема да ги оставиме да кампуваат, кога имаат покрив кај свои. Сакаат да уживаат и им излегуваме во пресрет. И ние пиеме понекое пиво секоја вечер. Нели е празник на пивото. Прекрасно се дружиме - вели Стојаноска.

Илија Стеваноски од САД првпат присуствува на пивскиот фестивал. Вели дека му се допаѓа расположението на фестивалот.

- Изненаден сум од оптимизмот кај луѓето, оти имав сознанија дека владее очај и разочарување. Запознав луѓе од Битола и од Охрид кои специјално дошле да го слават пивото. Им честитам на организаторите. Беспрекорно е добро, од музиката, љубезноста, амбиентот, пивото и скарата, па до хигиената - вели Стеваноски.

Локалните власти изразија задоволство од одѕивот на првите фестивалски денови и оптимистички најавуваат дека годинава ќе биде надминат ланскиот рекорд од 300 илјади посетители