Лавовите најчесто напаѓаат после полна Месечина

Лавот најчесто напаѓа човек после полна Месечина, тврдат американските научници. Другите предатори, како што се волците исто така се најопасни во тој период.

Откритието е добиено со анализа на 500 лавовски напади во Африка. Може да се објасни зошто полната Месечина се смета за гласник на злото и катастрофите, како и нејзината поврзаност со врколаците и вампирите.

Научниците ги анализирале лавовските напади врз селаните во Танзанија во периодот од 1988 до 2009 година. Во повеќе од две третини од случаите, жртвите на нападите се убиени и изедени. Повеќето напади се случиле меѓу сумракот и 22 часот, во ноќите кога Месечевата светлост е слаба.

Лавовите најдобро ловат кога темнината им дозволува да го изненадат пленот, но во ноќите кога видливоста е голема, овие ѕверки веројатно гладуваат. Временскиот период кој доаѓа после полната Месечина истовремено е прилика за лавот да надомести за пропуштените оброци.

Најопасно време за луѓето се часовите после заоѓањето на Сонцето, посебно дента после полната Месечина.

Бројот на лавовските напади се зголемува за време на дождливата сезона, кога Месечината најчесто е скриена зад облаците. Во истражувањето објавено во магазинот Public Library of Science ONE исто така се вклучени и податоците од проверката на мерењата на стомаците на лавовите, кои редовно се вршат од 1978 година. Овие податоци ги чуваат властите во Танзанија.

Резултатите од истражувањето исто така покажуваат дека луѓето пред неколку години живееле поблиску до ѕверовите кои ловат ноќе.