Прилеп

Прилеп се подготвува за 11 -тиот по ред меѓународен карневал „Прочка 2011“. Манифестацијата не е само на денот на карневалот,  6 ти март, туку ќе има бројни настани сите три  карневалски дена на 4,5 и 6 ти март. Прилепчани се горди на карневалот кој потекнува од долговековна традиција на еснафот касапи и на познатите “Мечкари”. Домаќин како и секоај година е Локалната самоуправа и здружението “Мечкари”. Ќе има многу настани во трите карневалски дена, вели Снежана Ристеска, советник за култура во Локалната самоуправа .

- Се засилуваат подготовките. Прилеп секоја година е домаќин на преку 300 гости од странство и во центарот на градот дефилираат над  1000 учесници  со повеќе од 200 групни или поединечни маски. Така е и годинава. Најавени се околу 300 гости учесници од повеќе земји, претежно од соседните: од Будва, Црна Гора, од Шабац, Лесковац, Пожаревац, Врњачка Бања  од Србија, од Украина, две групи од Бугарија, и од Корча.  Најавени се и  високи претставници на Меѓународната карневлска асоцијација – FECC. Треба да дојде претседателот Хенри Ван Ден Крон како и висока делегација од Белгија. Од Македонија досега има потврда за учество на вкупно 200 маски од Струмица, Кавадарци, Сопот, Бегинште, Мокриево, Ратево. Последниве години видно учество имаат и креативните маски од основните и средните училишта. Најдобрите и најуспешните ќе бидат наградени. Карневалот во Прилеп има долга традиција, објаснува Ристеска. - Карневалот како културна манифестација е заснован врз една стара традиција на касапскиот еснаф и има единствени белези, па го прави уникатен на Балканот и го става Прилеп на светската мапа на посакувани туристички дестинации  како познат карневалски град каде в година ќе се одржи Меѓународната конвенција на карневали. Централен настан е дефилето на маски на прочка, в недела на 6 март напладне во центарот на градот, но три дена ќе биде карневлска атмосфера. - Прилеп ќе биде сцена каде ќе се случат бројни други настани. В петок во Центарот за култура “Марко Цепенков” ќе биде отворена изложба на маски. Свеченото отворање на карневалот  е в сабота на 5 ти март од 20 часот на бината на плоштадот “Александрија” со музички хепенинг. За добра карневалска  атмосфера трите дена од петок до недела ќе се погрижат кафулињата и рестораните во градот каде ќе се влегува под маски. Ќе има и многу изненадувања, вели Ристеска, потсетувајќи дека учесниците ќе може да ги пријавуваат своите маски  во трите дена пред Прочка. В недела по дефилето жири комисија ќе ги оценува маските и ќе додели по пет први, втори и трети награди.