Фан клуб Челси

Лампард паузира уште две недели

Челзи плати рекордна сума за Торес

Челзи го сруши британскиот рекорд плаќајќи 50 милиони фунти за трансферот на Фернандо Торес од Ливерпул на последниот ден од зимскиот преоден рок.

Дваесет и шестгодишниот шпански репрезентативец, кој потпиша пет и полгодишен договор со "сините", стана четвртиот најскап фудбалер на сите времиња, по Кристијано Роналдо, Златан Ибрахимовиќ и Кака.
- Ова е желба на секој фудбалер, да се обиде да игра за еден од најдобрите клубови во светот. Тие (Челзи) се еден од најголемите тимови во Европа и секогаш се борат за сите титули - кажа Торес на промоцијата.
Трансферот беше реализиран кратко пред истекот на крајниот рок од преодниот рок, кога Челзи и Ливерпул беа вклучени во четирите најголеми трансакции. Клубот од "Енфилд" се обиде да ја пополни празнината оставена од Торес ангажирајќи двајца напаѓачи, Уругваецот Луис Суарес од Ајакс за 22 милиони и Енди Керол од Њукасл за 35 милиони. Челзи, исто така, го доведе дефанзивецот на Бенфика Давид Луис за 21,3 милиони фунти.
Сепак, трансферот на Торес испрати порака на пазарот дека Челзи се уште е сила на која мора да се смета.
Торес, актуелен светски и европски првак со Шпанија, помина три и пол години во Ливерпул откако им се приклучи на "црвените" од Атлетико Мадрид за сума од 20 милиони фунти и во тој период постигна 81 гол на 142 меча.
- Многу сум среќен и горд што сум тука. Ова беа два-три тешки дена за мене. Навистина сум среќен што сум тука. Подготвен сум за предизвикот - додаде Шпанецот.
Торес ќе може да настапи за Челзи во Лигата на шампионите, бидејќи сезонава играше само во Лига Европа и ќе може да настапи против својот поранешен клуб в недела на "Стемфорд бриџ".
Овој јануарски преоден рок беше невообичаено активен, не само благодарение на двата премиерлигаша. Манчестер сити, конечно, успеа да го ангажира Един Џеко од Волфзбург, а актуелниот европски првак Интер доведе четворица нови играчи (Ранокија, Пацини, Каржа и Нагамото). Најголемиот ривал на "нераѕурите" Милан се засили со Антонио Касано од Сампдорија, Марк ван Бомел од Баерн Минхен и Никола Легроталје од Јувентус. Ланскиот финалист во Лигата на шампионите Баерн Минхен го купи Луис Густаво од Хофенхајм, кој остана и без Карлос Едуардо (Рубин Казан), но го доведе Рајан Бабел од Ливерпул. Најголемото изненадување го приреди Астон Вила, која плати дури 24 милиони фунти за напаѓачот на Сандерленд Дарен Бент.
Месецов, особено активен беше и турскиот гигант Бешикташ, кој ги ангажираше Мануел Фернандес од Валенсија, Симао од Атлетико Мадрид и Уго Алмеида од Вердер.

***

Палење дресови и смртни закани

Неколкумина разочарани навивачи на Ливерпул се собраа пред тренинг-центарот на Ливерпул и јавно го запалија дресот со број девет на Фернандо Торес откако се дозна дека потпишал за Челзи. Исто така, на неговата фан-страница на "Фејсбук" доби дури смртни закани од изневерените навивачи. Слично помина и неговиот наследник во Ливерпул Енди Керол, кој беше омилена фигура меѓу навивачите на Њукасл.

Абрамович нуди 50 милиони фунти за Фабрегас?

Роман Абрамович   Сопственикот на Челзи Роман Абрамович се подготвува да влезе во борба со Барселона за купување на 23 годишниот играч за врска на Арсенал Сеск Фабрегас. Шпанскиот репрезентативец повеќе пати се поврзува со враќањето во Каталонија, но прашање е дали цифрата од 50 милиони фунти ќе го промени неговиот став и ставот на управата на „топџиите“. Ова е сумата што во моментот Челзи е подготвен да ја даде за Фабрегс. Неодамна Абрамович плати 85 милиони евра за купување на центарфорот на Ливерпул Фернандо Торес и на Бенфика Давид Луиза.