А да ја прошетаме Македонија ?

Матка, со сите раскажани и заборавени легенди е мистичното место на "големиот" град.

Чувствувате потреба да ги наполните вашите гради со свеж планински воздух додека ги гледате облаците како лебдат на небото, го слушате гласот на дивите птици, додека над вас, ветрот се бори со густите зелени дрвја!?

Не треба многу да патувате за да го најдете местото од описов!

Во престолнината на Македонија, "живее" Матка, со сите раскажани и заборавени легенди, мистичното место на "големиот" град.

Фактот дека постои еден "паралелен свет" горе - долу, над земја - под вода, го покачува адреналинот. Можете да уживате во пешачење и прошетки, во традиционалната македонска храна, а за вљубениците во културата и за оние кои сакаат природа, за авантуристи или обични луѓе, нуди повеќе отколку што можете да видите за еден ден.

Место со сè уште неоткриени длабочини и тајни, вертикални карпи прикривајќи бројни пештери, спелеолошки и алпинистички планински центар, антички храмови и средновековни цркви и манастири.

Духовна утроба на Скопје која се служи со свети исцелителски води, прекрасна природа, 200 видови на ретки пеперутки, околу 1000 растителни видови, од кои 20% ендемски или многу ретки, смарагдно зелена вода.

Кањонот Матка зафаќа површина од околу 5.000 ha и се наоѓа на 17 km југозападно од Скопје, тој претставува кањон на реката Треска, која е десна притока на Вардар.

Матка претставува еден од најголемите рефугијални центри за време на глацијалниот период, што придонело денес на овој простор да се сретнат голем број реликтни и ендемични растенија и животни. Од вкупниот број на 1.000 видови на растенија, 20% се ендемити или реликти. Од терциерните реликти, позначајни се кошаниновата темјанушка (Viola kosaninii) и наталиевата рамонда (Ramonda nathaliae).

На локалитетот Матка се откриени 2 нови видови на вистински пајаци и 5 лажни скорпии. Во кањонот се регистрирани 119 видови дневни и 140 видови ноќни пеперутки. Се среќаваат и 77 видови на балкански ендемични мали пеперутки, а уште 18 други видови се нови за науката.

Поради големиот број на цркви и манастири пак, Матка го носи и името Света Гора.

Во кањонот Матка можете да ги посетите црквите и манастирите: манастирот "Успение на Пресвета Богородица", манастирот "Свети Никола" Шишевски, црквата "Свети Андреја", црквата "Свети Спас" со остатоци од ранохристијанските цркви, "Света Троица" и "Свети Ѓорѓија" и црквата "Света Недела" (во рушевини).

Крстарејќи по реката Треска со мало бротче, се стигнува и до пештерата Врело, една од најдлабоките пештери во Европа.

Подводната пештера Врело е лоцирана во кањонот Матка од десната страна на реката Треска. Пештерата е систем од две пештери една над и една под водата и езеро. На таванот е вистински "дожд" од сталактити, а не помалку зачудуваат неколкуте столбови.

Посебно воодушевуваат "столбовите близнаци" кои се високи околу 6 метри и се со бела кристална боја.

Во длабочината на пештерата се наоѓаат две езера, Мало и Големо Езеро со своја т.н. руска плажа. Плажата го добила името така што меѓу првите во неа се бањале руски пилоти вработени во македонското воздухопловство. Малото езеро има форма на осмица. Во најширокиот дел има димензија од 8 м, а должината и длабочината му се 15 м, додека Големото Езеро има должина од 35 м, а длабочина од 15-18 м.

Присуството на сталактитите во водата упатува на заклучок дека некогаш во пештерата немало вода. Оваа констатација ја потврдува еден спелеолог и информира дека езерата се создадени по изградбата на акумулацијата Матка во 1936 година.

Во пештерата има и т.н. "концертна сала", од чија лева страна се таканаречените "пишани камења". Станува збор за систем од знаци, можеби и за писмо, за чие дешифрирање и толкување e потребна стручна помош.

Истражувањата од летово, покажаа дека во салата Пеони која е сува пештера што се наоѓа на 120 метри од влезот во подводната пештера Врело и до која може да се дојде само со нуркање, има 19,8% кислород, што е доволно за дишење.

Дали е ова доволно за да ја посетите Матка овој викенд?