Офтопик

Во државата има ист број жени и мажи таков е и соодносот на запишаните во основно образование, додека во средните училишта и факултетите има повеќе лица од женскиот пол

Жените во Македонија се подолговечни од мажите. Според податоците на Државниот завод за статистика просечниот животен век на жените е 74, а на мажите 69 години.

Бројот на мажи и жени во државата е речиси идентичен, односно половина од населението го сочинуваат жени, а другата половина мажи, но бројот на жените во возрасната група над 65 години е поголем.

Во последните десетина години во Македонија во тренд е и стареење на населението. Младата популација од 0 до 14 години од 22,8 отсто во 1999 до 2009 година се намалила на 17,7 проценти. За сметка на тоа во истиот период населението постаро од 65 години од 9,8, пораснало на 11,6 проценти.

Публикацијата уште покажува дека жените порано стапуваат во брак. Тие се мажат во просек на 25 години, а мажите се женат на 28. Најзастапен тип семејства во државата се тие со две деца. На секои 100 родени деца во 2009 година се регистрирани 24 извршени абортуси.
Податоците на ДЗС покажуваат и дека бројот на момчиња и девојчиња кои се запишани во основното образование е ист, но дека во средно или високо образование доминираат лица од женски пол.

Стапка на вработеност кај жените е 29,4 проценти, а кај мажите 47,5 проценти, додека стапката на невработеност кај жените е 32,8, а кај мажите 31,8 проценти.
На последните избори од вкупниот број кандидати за советници во локалните самоуправи жени биле 36 отсто, додека меѓу кандидатите за градоначалници ги имало само 4 отсто. Од избраните во советите 27 проценти се жени, а во државата нема ниту една жена градоначалник.