Во продолжение на претходно изнесениот артикл за интересните факти што можеби не сте ги знаеле, следуваат уште пет, што ги разлистуваат рекордните моменти во историјата на „Ел Класико“.

- Десет години без директен трансфер од еден во друг клуб
Вкупно 33 фудбалери во кариерата заиграле и за Реал Мадрид и за Барселона. Сепак, последен пат во 2000 година се случи директен трансфер од едниот во другиот клуб (Фиго од Барса во Реал), без играчот да настапува за некоја трета екипа во меѓувреме. Во последниве десет години двата дреса ги носеа уште Селадес, Алфонсо Перез, Роналдо (вистинскиот, не Кристијано), Ето и Савиола. Од Барса во Реал преминале 21 фудбалер, спротивната насока ја оделе 12 играчи.

- Роналдињо е единствениот кој добил аплауз од навивачите на Реал Мадрид
Се случи тоа на „Ел Класико“ во 2005 година, кога Барселона го победи Реал на „Сантијаго Бернабеу“ со 3-0. Роналдињо постигна два од трите гола и беше поздравен од навивачите на Реал Мадрид со искрен аплауз. Историјата не памети слична ситуација.

- Судијата Итуралде Гонзалез е многу непријатен за Реал
Реал Мадрид загуби 27 проценти од натпреварите на кои судија бил Гонзалез, човекот кој ќе суди и вечерва. Споредено со просечните 12 проценти, овој судија е најнепријатниот за тимот од Мадрид. Втор на листата, „коинцидентно“ е неговиот дедо, Итуралде Горостијага. Гонзалез два пати има судено на „Ел Класико“ и во двата наврати Барселона победуваше со по 3-0.

- Двете екипи вредат повеќе од една милијарда евра
Ако се водиме според „Трансфермаркт“ (http://transfermarkt.de), 25-те пријавени играчи на Реал Мадрид вредат 517 милиони евра, додека оние на Барселона се поскапи за десет милиони. Ова е најскапото дерби во историјата, што го престигнува рекордот на минатогодишното. Најскап е Лео Меси, кој е проценет дека вреди точно сто милиони, односно десет милиони повеќе од Кристијано Роналдо.

- Шпанските медиуми очекуваат нов „натпревар на векот“
„Ел Класико“ во 2002 година, што беше дел од полуфиналето во Лигата на шампионите, е прогласено за натпревар на векот. Го прогласија шпанските медиуми, а го прифатија и сите останати. Тогаш Реал Мадрид помина понатаму со вкупен резултат 3-1, а натпреварот на „Ноу Камп“ беше следен од повеќе од 500 милиони луѓе ширум светот од повеќе од сто различни земји. Медиумите во Шпанија го најавуваат денешниот меч како натпревар што ќе го урне тој рекорд.