Савевски поднесе оставка

Љубомир Савевски поднесе оставка од селекторската функција на македонската ракометна репрезентација. Савевски вели дека ваквиот потег го повлекува во интерес на репрезентацијата и обвини неколку медиуми за непринципиелна кампања за негово заминување. На последниот тренинг не се појавија 6 ракометари на Металург. Ракометарите кои ја одбија поканата на Савевски рекоа дека ги навредувал на последниот натпревар во Автокоманда, каде тој ја предводеше екипата на Вардар Про.

„Оставката ја дадов во интерес на репрезентацијата. Против мене се води организирана кампања. Во медиумите се појавија измислици дека јас сум ги избркал играчите од првиот тренинг на репрезентацијата. Ги отфрлам овие неточни обвинувања, но заради смирување на тензиите кои настанаа во репрезентацијата пред квалификациите за ЕП 2012 одлучив дека е најдобро да се повлечам од селекторското место“.

Ристовски го избрка Савевски од Вардар?

Ракометниот вицепрвак Вардар вчера неочекувано остана без тренер, откако Љубомир Савевски поднесе оставка, негова втора за период од само три недели. Откако пред 20-ина дена, на самиот старт на квалификацискиот циклус за ЕП 2012, го напушти кормилото на машката репрезентација под притисок на бојкотот на неколкумина играчи на Металург, се шпекулира дека сега од слични причини си замина и од клупата на "црвено-црните". Овој пат, станува збор за наводен конфликт со капитенот Борко Ристовски.
Иако првиот голман на репрезентацијата не сакаше ништо да коментира, јавна тајна беше дека неговите односи со Савевски беа на стаклени нозе уште од доаѓањето на Ристовски во клубот ова лето. Двајцата, наводно, за првпат се судриле уште во подготвителниот период, на турнирот во Добој, и тогаш тргнаа шпекулациите дека Савевски нема да издржи долго на оваа функција.
- Да, Савевски поднесе оставка и Вардар моментално нема тренер. Ќе размислам што понатаму - рече претседателот на "црвено-црните" Михајло Михајловски.
Савевски ја презеде екипата од Веселин Вујовиќ на полусезоната од минатото првенство, па, и покрај една победа над Металург, Вардар тогаш ги испушти и двата трофеја. Од клубот си заминува по уште еден пораз во борбата на два авторитети, откако истата судбина претходно ја доживеа и во Кометал ЃП (Радуловиќ) и машкиот национален тим (Мојсоски, Алушевски, Ангелов...).

Металург чека реванш, Прилеп чека одлука

Двата женски претставници на Македонија беа во центарот на вниманието на отворањето на евросезоната годинава

Прилепскиот тим, Жито Прилеп е во исчекување на одлуката на ЕХФ за натпреварот со Арион, кој не се одигра. Познато, Грците не сакаат да играат ако видат шеснаесеткрако сонце на нечиј македонски дрес. Клупски Арион можеби и ќе се нафател, но јасно му било предочено од грчката федерација дека ќе има последици за клубот доколку излезе на терен.
ЕХФ бил прилично јасен, па сега Прилеп е во очекување на официјализирањето на службениот резултат и пласманот на тимот во 1/4 финалето на Челенџ куп. Мечот кој не се одигра сигурно ќе биде службен 10:0 за Ж. Прилеп, но се очекува и формална елиминација на Арион и верификација на пласманот на македонскиот тим во следното коло.
За разлика од Прилеп, кој без да се појави на паркетот се пласираше во 1/4 финалето, актуелниот првак Металург е во сосема поинаква ситуација.
Лада Тољати, едно од најпознатите ракометни имиња, последниве десетина години во Европа е противникот на Металург во 1/8 финалето на Купот на ЕХФ.

Черноиваненко: Металург е екипа која се бори до крај
Десното крило на руската Лада Тољати, Олга Черноиваненко беше најдобриот стрелец на натпреварот со Металург. Руската репрезентативка за "Македонски спорт" искоментира за атсмоферата во тимот на Лада и за натпреварот одигран во "Олимп". 
"Ние претпоставуваме дека натпреварот нема да биде лесен. Сите екипи кои се од југословенската школа  се силни, тврдоглави, борбени. Плус ние имаме густ распоред на натпревари во рускиот шампионат, што, секако, можеше да влијае на натпреварот. Мислам дека во Македонија нема да биде едноставно. На крајот, Металург ќе игра на домашен терен, што е дополнителен стимул, плус тука е и поддршката од публиката", вели Черноиваненко.

Како што е познато, нашиот северен сосед следната година ќе биде домаќин на Европското првенство за ракометари. Ждрепката за групите ќе биде во среда точно на пладне во Белград, а веќе се знаат и некој детали околу составот на групите. Домаќинот сигурно ќе игра во Белград, Хрватска ќе биде носител на групата која ќе се игра во Вршац, а нашата репрезентација групната фаза ќе ја игра во Ниш, додека Унгарците ќе играат во Нови Сад, бидејќи се води сметка со овој распоред да биде задоволен и економскиот интерес. Состав на шеширите за ждрепка:

Прв шешир: Франција, Полска, Хрватска, Германија.

Втор шешир: Данска, Норвешка, Шведска, Унгарија.

Трет шешир: Србија, Шпанија, Исланд, Чешка.

Четврти шешир: Словенија, Русија, Словачка, Македонија.