ФИФА СП (Мундијал)

Нема трета среќа за Холандија. Ниту нивниот трет настап во финалето на Светското првенство, не им ја донесе првата титула во нивните витрини. Таа замина во Шпанија. Холанѓаните имаа голема шанса за прв пат во својата историја да се закитат со најценетиот спортски трофеј, но загубија во големото финале од "фуријата", која беше подобра за тој еден гол и тоа постигнат во 116 минута. "Лалињата" имаа премалку време, само 4 минути за одново да се вратат во натпреварот. Останува фактот дека своите шанси, одличните момци во "портокалово" ги пропуштија во регуларниот дел, кога имаа повеќе упатени удари кон противничкиот гол од Шпанците. Убавите шанси, пред се онаа на Робен во 62 минута кога излезе очи во очи со Касиљас, не беа доволни да се совлада еден од најдобрите светски голмани. Кога не се користат шансите, секако дека следува казна.

Сепак, Холандија и покрај тоа што го прифаќа поразот, главна преокупација им е делењето на правдата на англискиот судија Хауард Веб, кој според нив судел скандалозно и во нивна штета. Најгласен од сите беше Арјен Робен, кој жестоко го нападна Веб.

"Кога ја имав својата втора шанса, судијата требаше да досуди слободен удар, притоа да му додели втор жолт или директен црвен картон на Пујол. Тој место тоа дозволи предност, иако немаше предност затоа што едвај се движев, па Касиљас веќе беше преблиску. Во финале на светско првенство треба да суди одличен судија", рече Робен, кој претходно ја утна најубавата шанса на натпреварот откако од чиста позиција не успеа да го совлада Касиљас.
"Не ја реализирав првата шанса поради сопствена грешка. Не бев доволно трпелив, и требаше да го минам и голманот место да упатам таков лош удар", смета Робен.

Ниту Весли Снајдер не штедеше зборови да го нападне главниот судија, иако во стил на голем "џентлмен" го призна поразот честитајќи им ја титулата на Шпанците.
"Освоив големи три трофеи оваа сезона со Интер, а сега ми избега четвртиот. Голема штета, но мислам дека треба да бидеме горди, како ние така и целата нација", рече Снајдер, кој смета дека Веб морал да го исклучи Иниеста поради стартот над Марк ван Бомел пред Шпанецот да го постигне победничкиот гол.

"Постоеше еден момент кога Иниеста го удри Ван Бомел. Тоа го виде четвртиот судија, и рече дека го виде, а не му укажа на главниот судија да покаже црвен картон. Потоа и при постигнувањето на голот требаше да има корнер за Шпанија. Скандалозно е тоа што мораше да заврши на ваков начин", коментира Снајдер.

Сепак, еден момент повеќе би рекле намерно Холанѓаните и тоа како го заборавија, а тоа е "жестокиот" старт на Де Јонг врз Чаби Алонсо. Фудбалерот на Холандија со копачката во градите го фаулираше Алонсо, а овој, за среќа, избегна посериозна повреда. Инаку, тоа е класичен црвен картон, но од таборот на Холандија како да заборавија тоа да го кажат. Се е во ред, и црвениот картон на Пујол, кој можеби и требаше да го добие (за Иниеста и не баш), и можеби лошото судење на Веб, но да се заборави, односно да не се види таков "жесток" старт од страна на четирите судии е навистина несфатливо.

Колку и да сакаат вината да ја префрлат врз судиите, факт е дека самите се виновни за поразот, затоа што го имаа натпреварот во своите "раце" во регуларниот дел, но кога не се користат шансите, секако дека следува казната. А таа дојде кога Холандија воопшто не посакуваше, пред крајот на второто продолжение. Па така "портокаловите" момци ќе мора да чекаат најмалку уште четири години за одново да се обидат да дојдат до блескавиот трофеј.

Сепак, оваа генерација покажа дека е "зрела" за големи работи. За "лалињата" и ова е голем успех, иако може да жалат што не го однесоа пехарот во својата земја. Заслужија и тие да се радуваат на трофејот, но, за жал, испаднаа како поразени во финалната пресметка. Доколку се биде како што треба на следниот голем настан, со мали неопходни измени (пред се поради откажувањето на Ван Бронхорст), Холандија може да се надева на титула. Ако не светска, барем европска.