Дајте една добра вест

За три недели во скопската Зоолошка градина треба да пристигнат неколку нови животни, меѓу кои крокодил, два нови тигра, четири пара кенгури, пар папагали Ара, две Ему птици, меркати и некои видови влекачи.

Новите животни се претежно донација на зоолошките градини од Чешка, како и од софиската зоолошка градина.

„Живеалиштето на крокодилот го завршивме. За тераруимот за влекачите во вторник ќе започне тендерската постапка за фирмата која треба да го гради. Треба да го завршиме проектот на кој интензивно работевме со Град Скопје за живеалиштето за слон и жирафа. Следната недела и тие ќе излезат во тендерска постапка и напролет ќе се реализираат. Веќе сме во интензивни преговори со фирмата Бинани која ќе донира слон. Преговараме со Зоолошката градина во Белград и Прага да донираат две до три жирафи“, вели директорот на скопската Зоолошка градина Дане Кузмановски.

Поради неодамнешните немили настани кога при транспорт угинаа два елени од хрватската Зоолошка градина, Кузмановски вели дека овојпат животните ќе се транспортираат со светски познатиот транспортер „Move one“ кој ги има сите светски и европски лиценци.

Во скопската Зоолошка градина денеска беше отворено новото живеалиште за животните јак, зебу и бизон, донација на општина Ѓорче Петров во висина од 800 илјади денари.

Живеалиштето се простира на 150 метри квадратни во централниот дел на градината со објект кој зафаќа три живеалишта.

Ѓорче Петров е првата општина која ја реализира својата донација
„Општина Ѓорче Петров си ја заврши својата обврска со задоволство. Со овој чин сакаме да дадеме поттик на сите останати градоначалници да направат еден исчекор, за Зоолошката градина да прерасне во еден репрезент на Балканот и пошироко“, рече градоначалникот Сокол Митровски

Мајмунот Коко кој е на ресоцијализација во Холандија треба да пристигне следната пролет.
„Пред една недела добивме нов извештај дека уште подобро се одвива неговата ресоцијализација. Телеком ќе гради ново современо живеалиште за Коко. Ги срушивме железните решетки кои изгледаа нехумано“, рече Кузмановски.

Во скопската Зоолошка градина во последниов месец родени се неколку нови животни меѓу кои два мајмуни, три лами, и три пони коњи