Откако е утврдено дека на 4 јануари се поднесуваат најголемиот број на бракоразводните парници, првиот работен ден во Новата година е прогласен за неофицијален ден за разводи во Велика Британија

Британските психолози утврдиле дека најголемиот број од брачните двојки во земјата, чија брачна врска е во криза, се одлучуваат за официјален развод на првиот работен ден во Велика Британија, по речиси двонеделното славење на божиќните и на новогодишните празници.

Според статистичките податоци, што последен пат се направени во 2008 година, на секои два новосклучени бракови, се регистрира по еден развод. Ваквиот податок доаѓа по откритието дека од 1972 година, кога е забележан врв на склучувањето бракови во земјата, постојано се регистрира пад во бројот на венчавките.

За разлика од порано, кога разводот се означуваше како траума во животот на брачните партнери, сега на него се гледа поинаку, па познатата британска стоковна куќа „Дебенамс“, од мината година почна прва со покренувањето на „листа на подароци“ за развод, исто онака како што постои таква листа и за венчавки, откако многу познати јавни личности во Велика Британија, своите разводи ги одбележуваат со специјални забави и приеми на кои сите носат подароци.

Бизнисот со разводите бележи забрзан раст, особено кога станува збор за честитките и испраќањто електронски пораки преку интернет, при што како најпопуларни и најбарани се „честит развод“ или „кучката конечно си замина“. Како трговски хит се смета продавањето на маичката на која е напишано „штотуку разведен“, по цена од 22 фунти.

Лондонските весници како најпознати разводи во 2010 година ги истакнуваат раскинот на брачната врска на пејачките Шерил Кол и Кристина Агилера, на актерките Сандра Булок, Скарлет Јохансон и Кортни Кокс, како и на поранешниот потпретседател на САД, Ал Гор.