Прилеп

Американци се доселија во Прилеп

Три семејства од САД го избраа градот под Марковите Кули за место за живеење, ги прифатија имендените, сведните, сармите и одушевени се од тукашниот ритам на живеење

Членовите на американското семејство Киркпатрик станаа жители на градот под Марковите Кули пред две години, а во меѓувреме во Прилеп се доселија уште две семејства од САД. Кајл Киркпатрик со сопругата Жаклина, децата Ребека, Џошуа и Даниел, е со најдолг прилепски стаж, а семејството на 29-годишниот Спенсер Фолер од Тенеси, со сопругата и деветмесечната ќерка, во Прилеп е два месеца и ги учи македонскиот јазик и прилепскиот начин на живот. Тие се членови на Асоцијацијата за развој на духовните вредности „Изгрев“, која организира бесплатни к*рсеви по англиски јазик. Третото четиричлено семејство од САД што живее во Прилеп сега е на одмор во родната земја, а во Прилеп дојде пред една година.

Семејството Киркпатрик 12 години живее во Македонија. Пред да станат прилепчани, биле скопјани. Останале во Македонија бидејќи им се допаднала гостољубивоста на Македонците. Прилеп го откриле откако дошле да им помагаат на колегите во одржувањето часови по англиски јазик, им се допаднал и засега не планираат да го заменат со друго место. Ги ценат прилепчани зашто биле топли и дружељубиви луѓе и стекнале многу пријателства.