СП 2010 Јужна Африка

Холандската влада реши да ги награди холандскиот селектор Берт ван Марвијк и капитенот Џовани ван Бронкхорст за извонредниот резултат на Светското првенство прогласувајќи ги за витези. Сите холандски репрезентативци беа специјални гости на премиерот Јан Петер Белкененде, кој јавно им изрази благодарност од името на холандскиот народ. - Сите ние сме разочарани од поразот во финалето, но тоа никако не значи дека сме заборавиле на прекрасните моменти што ни ги донесовте со победите на претходните натпревари. Холандскиот народ е горд на вас и ви благодари за сите прекрасни спомени од мундијалот. Само би ви порачал дека не треба да чекаме уште 32 години за повторно да играме едно финале, би било прекрасно кога за четири години во Бразил ние би ги дочекале своите пет минути - изјави холандскиот премиер. Експедицијата на „лалињата“ потоа беше примена и од кралицата Беатрис, а витешките медали на селекторот и на капитенот им беа врачени од страна на министерот за спорт Аб Клинк. - Ова беше фантастично достигнување и сите сме ви благодарни - беше кратката изјава на Клинк по церемонијата. Холандските репрезентативци и стручниот штаб во текот на вчерашниот ден имаа обиколка со брод низ каналите околу Амстердам, исто како што тоа беше случај со генерацијата што во 1988 година стана европски првак предводена од Руд Гулит, Марко ван Бастен и Франк Рајкард.