Дневник со Латас

По стариот, комунистички обичај, Црвенковски не повикува гласајте на избори за мене. Не. Затоа што нема што да понуди. Тој, доследен на својата деструктивна школа, повикува гласајте против Груевски. За инает.

Да е политичар од формат, да има програма, да има саглам луѓе, да има идеја и визија... тој би повикал да гласаат за него.

Но, и самиот Бранко знае дека нема зошто да гласаат за него. Па не ги ни повикува. Бара да гласаат против. Против Груевски. Замислете Црвенковски да е тренер на голем клуб. Клуб на кој не му оди никако, а тој не менува ни игра, ни играчи... а, нормално, ни тренер. Како таков лузер, не му доаѓа ни публика на терен. Штетата е голема, клубот тоне ама клубот нема луѓе со интегритет, особено не со авторитет. Таквите ги исчистил на време. И никој не му може ништо.

И сега, таквиот тренер на таквиот клуб, ја повикува публиката, сепак, да дојде на утакмица која во пет до дванаесет прифатил да ја игра. Без тренинзи, без спремена екипа, без стратегија... бамборел наоколу дека ќе ја бојкотира утакмицата. И, притиснат од играчите прифаќа во последен момент да се појават на терен. Таква екипа, со таков тренер, има судбина која е лесно предвидлива. Има губитничка судбина.

И сега, таквиот тренер, ја повикува публиката да дојде и, пази богати, да не навива за нив. Затоа што нема причина да го поддржи. Туку, да дојде за да навива против другиот тим.

Ако планот му успее, другиот тим ќе загуби. Ако планот му успее, што е далеку од можно, нели. И, ако планот му успее тој и понатаму ќе остане тренер на тимот кој не тренира, кој нема ни игра ни играчи, кој нема иднина...

Па, сакаат ли навивачите на тој тим и понатаму да имаат тренер и екипа која е предмет на заебанција, и извор на деструктивна, опасна игра од која нема победа. Освен скршени нозе на противничките играчи. Значи, Црвенковски не повикува гласајте ЗА, туку да се гласа ПРОТИВ.

И, сега, јас имам проблем. А верувам и вие. Имам проблем затоа што на гласачкото ливче пишува ЗА кого сакаш, а не ПРОТИВ кого би гласал.

Нема опција за да се спроведе предлогот на Бранко. Затоа, во ниту една демократска земја, нема ни кампања, ни гласачко ливче против некого. Освен во плановите на Црвенковски.

Но, ако веќе така сака, еве пет причини зошто ќе гласам за Груевски, а против Црвенковски.

1. Ќе гласам за Груевски затоа што имаше сила и моќ да ја реформира својата партија, ВМРО-ДПМНЕ. Денес таа партија има најдобри европски контакти, во споредба со било која друга, и за неа може да гласа граѓанин од било која вера или етничко потекло. За разлика од порано. Затоа и постојано победуваат.

2. Ќе гласам затоа што имаме добри односи, за првпат и во исто време, и со Бугарија, и со Србија и со Албанија. И со Грција, ако се изземе спорот околу името. Тоа никому, досега, не му успеало.

3. Ќе гласам затоа што два пати ги зголеми платите во јавниот сектор, и два пати ги зголеми пензиите. Воведе бесплатно основно здравство, и бесплатно образование. Патем, ги намали сите даноци.
4. Ќе гласам "за", затоа што ни приближно немаме корупција и криминал како во времето на Бранко. Ама, ни приближно. А онаму каде што ја има, се почесто ги гледаме фатени, и изнесени пред суд.

5. Ќе гласам "за", затоа што изгради стадиони, болници, патишта, музеи, факултети, школи... за пет години успеа да изгради десет пати повеќ е отколку Бранко во неговите петнаесет години власт...

Има уште многу, но и ова е доволно.

Ќе гласам "против" Бранко затоа што:
1. Сопствената партија ја држи во заложништво на својата суета, и својата биографија која би се нарушила ако тој би бил избркан од СДСМ. Тоа што биографијата на СДСМ се уништува без милост, не му значи ништо. Е па, ако шефот на партијата го боли уво за неа, мене ми е гајле уште помалку.

2. Ќе гласам "против", затоа што има дискриминаторски однос кон соседите и малцинствата. Да се потсетиме: Србите, Турците, Власите, Ромите и Бошњаците десет години бараа да влезат во Уставот, но СДСМ не им го дозволуваше тоа. Нив, во Уставот, ги внесе ВМРО-ДПМНЕ. Како што ВМРО-ДПМНЕ отвори иницијатива за гарантирани пратенички места за малцинствата, а СДСМ пет години е против тоа.

3. Ќе гласам "против" Бранко затоа што на мојата мајка неговата влада и украде две пензии, и затоа што моите роднини и комшии од скопските фабрики останаа без работа после неговата приватизација. Имам обврска кон нив. Мојата обврска е Црвенковски да ја плати политичката цена за тоа.

4. Ќе гласам "против", затоа што во СДСМ и ден-денес на чело се лу- ѓе кои го создадоа македонскиот криминал и корупција, без оглед дали мислам на приватизацијата, на ТАТ, на спакуваната војна во 2001 година, на пасошите од ЗУС, Бачило или Надеж, на фри-шоповите или Сорос фондовите...

5. Ќе гласам "против" затоа што ниту едно школо, факултет, стадион, болница, музеј... не се изгради под власт на Бранко Црвенковски. А бе- ше на власт петнаесет години.

Мојата лична, дополнителна причина е што ќе гласам "против" затоа што јавно бараше Ѕинго да ме смени од уредник во Сител за да му понуди коалиција. Затоа што организираше кршење на Сител, со неговите партиски муџахедини. Затоа што со Милчин и црните фондови на Сорос го создадоа кланот на Велија Рамковски, а уништија слободен пазар на медиуми и слободно новинарство.

Затоа што, како и Гадафи, неговиот народ не го сака, а тој бара од странство да му помогнат да остане на власт. Му помагаа, но веќе не.
Затоа. И за многу друго.

Пишува: Драган П. ЛАТАС