Бумбар и слободата на говорењето

Неделковски: Следен чекор е ликвидација на предавниците

Предраг Петровиќ

Миленко Неделковски

Од измамник до ликвидатор. По низата закани и навреди, Неделковски сега во мисија да ликвидира предавници.

Водителот што презентира прислушувани снимки јавно во емисијата Зебра повика на ликвидација на сите предавници. Од каде му е правото на Неделковски да одредува кој е предавник, а кој патриот тој нема одговор.

„Кон предавник, неможе да има друг говор, освен омраза.

А кој одредува кој е предавник? Миленко Неделковски и пет луѓе?

- Не, не Миленко, ни пет луѓе. Кои се тие пет луѓе? Предавник заслужува говор на омраза.

А зошто не формирате здружение за ликвидација на непријатели?

- Тоа е следно“, рече Миленко Неделковски во емисијата Зебра.

Јавниот обвинител сериозно треба да размисли како ќе постапи со ваквиот повик и закани за линч од Неделковски. Во какво општество живее Македонија, доколку водител што се заканува дека ќе ликвидира неистомисленици добива медиумски простор, а Премиерот и министрите се негови најчести гости?

Дали овој човек што се заканува со ликвидации а истовремено ги брани и промовира ставовите на владата е под нивна контрола или власта планира конечно да се огради од неговите изјави и настапи во медиумите? Дали е случајна безрезервната поддршка на Неделковски кон владината политика?

„Да го кажел Премиерот својот став, и на крај им го н....а“, рече Неделковски во емисијата Јади бурек.

Заканите за ликвидација стигнаа ден по објавувањето на снимката на која е прислушуван сопственикот на А1 телевизија Велија Рамковски. Ниту од МВР ниту од обвинителството засега нема одговор како оваа снимка стигнала кај Неделковски, ниту пак како е направена. Од таму упатуваат на обвинителството кое пак функционира само во работни денови.

Сопственикот и новинарите на А1 во последно време се постојана мета на сериозни закани, за Рамковски кој во неколку наврати беше следен, стасуваат пораки дека даночниците му тропаат на врата, дека има предмет и ке биде спакуван, дека зградата во која е сместена телевизијата и куќата во која живее се дивоградби.

За новинарите дека се предавници, грчки платеници и помагачи на тероризмот. Серијата лаги, закани и навреди секогаш се пренесуваа од истите владини пропагандисти кон А1 како медиум кој не потпадна под било чија партиска контрола.