Дајте една добра вест

Туристичката сезона во Дојран започна многу порано од лани и според слободните проценки на туристичките работници таа е подобра за разлика од изминатите години.Пријавени се многу повеќе туристи во приватното сместување, а и хотелите се исполнети.

„Подобрувањето на туристичката сезона пред сè се должи на подобрување на хигиената во градот, но и богатата понуда на културно-забавен живот. На 17 јули започна манифестацијата „Дојрански ракувања“ која се одржува 34 година по ред и во рамките на овој настан се случуваат театарски претстави, кино-проекции. Приватните плажи се полни, но посебно градската плажа. Според коментарите кои пристигаат во Туристичкиот инфо-центар, туристите се презадоволни. Посебен наплив на гости очекуваме во август кога цветаат алгите во езерото, кое инаку е во одлична состојба.“ изјави за „Макфакс“, Магда Кречева од Туристичкиот инфо-центар на Дојран.

Изјавата на Кречева ја потврди и Милчо Арсовски, сопственик на хотелот „Полин“ во Дојран: „Сезоната во Дојран започна многу порано за разлика од изминативе години. Капацитетот на хотелот е исполнет 100 отсто, за разлика од лани кога искористеноста на хотелскиот капацитет изнесуваше 80 отсто. Подобрувањето на сезоната се должи на ангажираноста на Општината во поглед на уредување на плажите, како и здружување на силите на градоначалникот со приватните и хотелските туристички работници. И природата е на наша страна, бидејќи се врати и водата во езерото.“

Дојран поседува неколку прекрасни ресторани каде може да се проба далеку позната дојранска риба, како и специјалитетите риба во тава и риба на трска.

Како потврда на богатиот забавен живот е и вечерашниот концерт „Од самрак до зори“. Владо Јаневски, Игор Џамбазов, Дани, Ѓоко Танески, Адриан Гаџа, Биба Додева и други македонски пејачи ќе бидат дел од овој настан кој ќе започне вечерва во 21 часот на плажата „Скала бич“ во Дојран.

Со сетовите на пет познати диџеи, настан кој се случи на 11 јули, беше означен и официјалниот старт на туристичката сезона во Дојран