Бугарија- вести, настани, актуелности

 - Во организација на Културно-информативниот центар на Република Македонија и Центарот за култура „Антон Панов“ од Струмица, во рамките на меѓународната соработка на македонското Министерство за култура во соработка со Националниот дворец на културата (НДК) од Софија вечер ќе биде отворена изложба во АртГалерија на НДК под наслов „Современа македонска ликовна уметност“ од фондот на меѓународната Струмичка ликовна колонија.

Изложбата ќе ја отворат директорот на НДК Христо Друмев и директорот на Центарот за култура од Струмица Иван Јовев.

На изложбата ќе бидат претставени 48 слики, десет цртежи и графики и седум скулптури од шеесетина современи македонски ликовни уметници од фондот на меѓународната Струмичка ликовна колонија.

Оваа изложба со својата богата содржина нуди информации за сфаќањата и случувањата кои се појавуваат во македонската ликовна уметност од педесеттите години на дваесеттиот век се до денес. Бидејќи делата се создавани на Колонијата во одредени периоди, таа не претставува целосна историја на современата македонска ликовна уметност, туку е пред се синтетички преглед на суштествените појави во досегашниот од на меѓународната Струмичка ликовна колонија. Презентираните дела најрелјефно го изразуваат творечкиот идентитет и улогата на авторите во македонската ликовна култура.

Сите процеси во македонската ликовна уметност на оваа изложба се презентирани со најистакнати ликовни творци што постојат во фондот како што се: Никола Мартиновски, Димитар Пандилов, Димитар Кондовски, Димче Коцо, Димо Тодоровски, Илија Аџиевски, Петар Мазев, Глигор Чемерски, Петар Хаџи-Бошков, Боро Митриќески, Вангел Наумовски, Илија Пенушлиски, Насо Беќаровски, Драган Аврамовски-Гуте, Танас Луловски, Трајче Јанчески, Ана Темкова, Божидар Дамјановски, Ордан Петлевски, Душан Перчинков, Симон Шемов, Рубенс Корубин, Петар Георгиевски, Сергеј Андреевски...итн.

Делата кои  што ќе бидат изложени се потврда за творештво кое произлегува, ја црпи својата инспирација во традицијата, но комуницира и со модерното и апстрактното во  ликовната уметност во светот, со што учествуваат во градењето на нашиот современ културен идентитет и афирмација на македонската уметност на светската сцена.