Штип како град

Додека надлежните молчат, јавна тајна во Штип е дека за 50 евра може да се купи друштво со убава девојка. Во градот, во кој функционираат многу фирми од текстилната дејност, често доаѓаат директори и бизнисмени од другите градови, кои по напорните деловни разговори бараат малку одмор

Штип нема улица со црвени фенери како Амстердам, но по откривањето и разбивањето на мрежата на малолетничка проституција остана препознатлив како град во кој лесно може да се купи „љубовта“. Во организираната акција на полицијата минатото лето беа приведени шест бизнисмени на возраст меѓу 42 и 65 години, кои користеле сексуални услуги на осмоодделенки.

Во полициската станица велат дека оваа појава по овој случај е намалена. Но од разговорите со штипјани при нашата посета деновиве слушнавме оти проституцијата во градот е сериозен проблем, кој бара поинаков третман од семејствата и од надлежните институции.

И додека државата и надлежните молчат, некои девојки од тоа милје слободно зборуваат за она што го работат. Во Штип јавна тајна е дека за 50 евра може да се купи друштво со убава девојка. Во градот, во кој функционираат многу фирми од текстилната дејност, често доаѓаат директори и бизнисмени од другите градови, кои по напорните деловни разговори бараат малку одмор.

- Сето ова е добро организирано - вели струмичанец, кој секоја недела еднаш или двапати оди во градот под Исарот заради бизнис.

Тука криминалот е поразличен од другите места. Постои во сите негови облици, но во поинакви рамки. Кражбите се редовна појава, а присутен е и шверцот на цигари и пијалаци, како и нелегалната препродажба на марихуана, екстази и на трамадоли.

Одвреме-навреме во Штип и Штипско има и по некое убиство. Се крадат акумулатори и по некој автомобил, се посега и по злато. Има тепачки, ама мотивите се поинакви. Нема нарушувања од поголем обем. Тука нема излив на национална омраза.

- Полицијата бележи сé подобри резултати во откривањето и апсењето на организираните криминални групи. Одговорно тврдам дека за нас нема недопирливи, нема повластени ни меѓу задолжените за спроведување на законот ни меѓу оние што се отспротива ни изјавија од СВР Штип.