„Македонија излезе од рецесија“

	Зоран Ставревски, министер за финансии

Овој заклучок властите го поткрепуваат со малиот пад на бруто домашниот производ и отворањето нови работни места.

Но експертите и опозицијата се сомневаат дека Македонија е на добар економски пат.

Благи последици?

Земјата излезе од рецесија со многу мали последици за економијата, соопшти потпретседателот на Владата и министер за финансии Зоран Ставревски.

Како доказ тој ги презентираше податоците на Заводот за статистика дека економската активност кон крајот на минатата година се зголемила за 1,3%, а бруто домашниот призвод имал минимален пад од 0,7%, додека се бележи дека немало отпуштања и се намалила невработеноста:

„Остварен е трет најдобар економски резултат во Европа мерено според БДП и спречени се негативните последици на пазарот на работната сила."

Вице-премиерот Ставревски овие резултати и' ги припиша на добрата економска политика на Владата, како што рече, и на пакетот антикризни мерки, особено зголемени инвестиции во инфраструктурата и градежништвото.

Опозицијата се сомнева

Но, економскиот аналитичар Висар Адеми вели дека проектите на Владата во граденижштвото не може долгорочно да ја закрепнат економијата:

„Ова е лимитиран ефект, затоа што по завршување на ови проекти и градежни работи градежништвото повторно ќе се врати во истата состојба."

Опозицијата не верува во податоците на Владата за минималниот пад на бруто домашниот прозивод, ниту пак за проекциите за економски развој годинава.