Сакам да кажам...

_____________________________________________

 

 Човековиот мозок се смалил за 20 отсто

Човековиот мозок се смалува, тврдат француските научници кои направија реплика на череп стар 28.000 години. Истражувачкиот тим тврди дека човековиот мозок денеска е за 20 отсто помал од мозокот на праисториските луѓе.

Пронајдокот не сугерира дека нашите предци биле поинтелигентни, особено имајќи ги предвид претходните истражувања кои покажаа дека не постои врска меѓу големината на мозокот и интелигенцијата.

Черепот стар 28.000 години, наречен Cro Magnon 1, е пронајден во 1868 година и се чува во Националниот музеј за историја во Париз.

Се верува дека черепот му припаѓал на добро граден човек висок над метар и осумдесет сантиметри. Последното откритие ги потврди верувањата на научниците дека мозокот на нашите предци бил нешто поголем од оној на сегашниот човек.

Постојат неколку теории за тоа зошто човековиот мозок се смалил. Според одредени научници во праисторискиот период на луѓето им била потребна поголема глава за да ги преживеат сите опасности со кои се среќавале.

Другите научници, пак тврдат дека човековата глава била поголема поради храната која ја консумирале, односно дека со пронаоѓањето на храна која полесно се џвакала и јадела, телото и човековата глава престанале да растат.

Сепак, постојат и други теории, како на пример онаа за големата стапка на смртност кај новороденчињата. Според оваа теорија само посилните деца преживувале, а тие најчесто имале поголема глава.

Научниците веруваат дека ова откритие ќе биде од голема корист за натамошните истражувања. Черепот Cro Magnon 1 неделава ќе биде претставен во американскиот Националниот музеј за историја во Вашингтон.