F1 Вести

Мотото на новата формула 1 сезона е јасно: "Шуми се врати!". Во нормални услови трансферот на светскиот шампион Џенсон Батон во Мекларен, каде што ќе вози со претходниот шампион Луис Хамилтон, или трансферот на Фернандо Алонсо во Ферари ќе беа најголемите вести. Но, само при нормални услови, а формула 1 никогаш не била "нормален" спорт.

1239 денови откако се натпреваруваше на својата последна трка, Германецот го има својот кам-бек во потера по осмата светска титула со неговиот германски тим, како сигурно може да се нарече Мерцедес. Но, нема да биде лесно бидејќи покрај очите на јавноста и очите на ривалите ќе бидат насочени кон Шумахер.

Минатогодишниот вице-шампион, Себастијан Фетел во Ред Бул, кој беше огромен фан на Шумахер во детството ќе сака да му покаже дека сегашноста припаѓа на младите, додека Ферари ќе сакаат да му покажат на Шуми дека згреши што си замина од советничката улога со "динамичкото дуо" Фернандо Алонсо и Фелипе Маса. Мекларен, пак, кои ќе бидат сопствен тим иако нивните мотори продолжуваат да доаѓаат од Мерцедес, ги имаат двајцата последни шампиони и очекуваат многу подобра сезона.

2010 носи многу суперлативи бидејќи првпат ќе има 4 светски шампиони (со 11 светски титули) кои ќе се борат за титулата, а исто така има и 24 возач во 12 тимови, кои требаа да бидат 13 пред повлекувањето на УСФ1. Болидите се подолги и веќе се зборува за нив како за лимузини, но трките нема да бидат обично возење. Болидите не смеат да долеваат гориво, а сезоната е долга 19 трки (две повеќе од лани).

Но, се тоа е во втор план.

На презентацијата на новиот Мерцедес во Валенсија по првите кругови на Шумахер дојдоа неверојатни 300 новинари од целиот свет. Барањата за билети за трките се зголемија драстично по одлуката на Германецот да се врати во декември, а ТВ станиците со договор за пренос задоволно ги триеја рацете. Насмеан беше и Ф1 шефот, Берни Еклстоун, кој се надева дека Шумахер ќе го врати гламурот по сите негативни наслови во последните неколку сезони.

"Фантастично! Дури и Михаел да губи, тој ќе биде нервозен и тоа ќе биде одлично за гледачите", изјави Еклстоун.

Мотивација повеќе ќе имаат младите возачи, кои го идолизираа Шумахер кога растеа и не сонуваа за шанса да се тркаат против него.

"Секако дека нема да гледам во ретровизорот да видам кога поминува Михаел да го пуштам", вели Фетел.

22-годишниот Германец, кој е фаворит на Еклстоун за титулата оваа година, вели дека е најдобро што фокусот пред сезоната не бил на него.

За разлика од Фетел, друг Германец кој се споменува како можен шампион, Нико Розберг нема луксуз да не размислува за Шумахер. Синот на поранешниот светски шампион Кеке Розберг е колега на Шуми во Мерцедес и мора да прифати незавидна позиција.

Сезоната, сепак, не почна без лоши вести. Место 13 тимови, сезоната стартува со 12, откако УСФ1 не успеаја да ја добијат трката со времето и со парите, а ФИА реши да не го додели нивното место на српскиот Стефан ГП.

Но, и покрај тоа, најважното е дека "Шуми се враќа!".

***
Розберг најбрз на тренинзите!

Нико Розберг беше најбрз, додека неговиот колега од Мерцедес ГП, Михаел Шумахер беше трет во втората тренинг сесија во Бахреин пред неделната прва трка од сезоната. Розберг го имаше најбрзиот круг од 1:55.409, за 0.494 секунди побрзо од Шумахер, додека Британецот Луис Хамилтон, шампионот од 2008 беше втор, а неговиот колега, актуелниот шампион Џенсон Батон, беше четврти. По нив следуваа Себастијан Фетел во Ред Бул и уште еден Германец, Нико Хулкенберг во Вилијамс.

Тренинг сесиите не мораат да значат мерење на вистинските перформанси пред саботните квалификации бидејќи тимовите користат различно ниво на гориво и го користат времето на патеката за подесување на сет-апот. Но, Мерцедес секако ќе бидат охрабрени од ова брзо време на Розберг.

Адријан Зутил во Форс Индија беше најбрз на првата тренинг сесија, но само 10. во втората. Шумахер беше 10. во првата сесија, две места зад Розберг. Фернандо Алонсо во Ферари беше втор најбрз во првата сесија, но само 13. во втората, а неговиот колега Фелипе Маса беше 16. во втората сесија по 4. место во првата.

***

Рено: "Мекларен почнуваат 'трка со вооружување'"

Рено ги обвинија своите ривали Мекларен дека почнуваат со "трка на вооружување" во формула 1 со контроверзното задно крило, и покрај тоа што ФИА објави дека тоа е легално.

"Јасно е дека дизајнот на крилото на Мекларен е целосно нелегално. Тие го прегазија духот на правилата и регулативите. Отворија нова трка на вооружување, која ќе чини многу пари за сите во спортот. ФИА мора да биде поцврста со овие работи", вели генералниот директор на тимот, Боб Бел, чиј тим оваа година има условна казна за местењето на Сингапур ГП трката во 2008.

Болидите на Мекларен ја поминаа инспекцијата во четвртокот, и тимот објави дека ги консултирале ФИА при развојот на крилото. Ко-сопственикот на Вилијамс, Патрик Хед, објасни дека крилото има дел кој се "храни" од воздушен тунел кој возачите можат да го контролираат со движењето на телото.

"Разбрав дека директорот на трки, Чарли Вајтинг, вели дека тоа е огреничено, но дека не важи за возачите, туку само за болидот. Но, јас се сеќавам кога нашиот т.н. 'активен' болид беше забранет, тоа се направи бидејќи еден клип се движеше и со тоа влијаеше на аеродинамиката на болидот. Сега Чарли вели дека коленото на Луис или Џенсон не се смета. Но, ако некој најде начин да го направи својот болид 0.3 или 0.4 секунди побрз, а друг не го направил тоа, тогаш тие биле многу умни", вели Хед.

***
ФИА потврди дека Британецот Дејмон Хил ќе биде меѓу возачите кои ќе бидат "помошници" на стјуардите на Ф1 трки во оваа сезона. Новото правило за оваа година покрај трите регуларни стјуарди поставува уште еден поранешен возач за оваа позиција, а за трката во Бахреин тоа е четирикратниот светски шампион Алан Прост. "Дејмон Хил се согласи за две трки, најверојатно Монако и уште една и имаме и други возачи за оваа улога", вели Греем Стокер, потпретседателот за спорт на ФИА.

Претседателот на ФИА, Жан Тод, вели дека се согласува со идејата за воведување на правилото на 107% за квалификациите во формула 1, но признава дека е тешко тоа да се направи за оваа сезона. До 2002 година, секој возач чиј најбрз круг беше надвор од 107% од времето на пол-позицијата не смееше да настапи на трките. "Тоа правило беше напуштено поради менувањето на квалификациите, но сега може да се врати", вели Тод. Ова може да биде главоболка за некои тимови бидејќи на пример Бруно Сена во Хиспанија беше на 11 секунди од најбрзото време, а Хеики Ковалаинен во Лотус на 5.4 секунди од времето на Нико Розберг.

Флавио Бриаторе вели дека нема да се врати никогаш во формула 1, и покрај тоа што му беше тргната доживотната суспензија. Поранешниот шеф на Рено беше казнет откако му нареди на Нелсон Пике да се судри на Сингапур ГП во 2008 за да му помогне на тогашниот колега Фернандо Алонсо да победи, но оваа одлука беше отфрлена од францускиот суд во јануари. "Не, 100% нема да се вратам. Се уште имам страст за формула 1, иако ќе беше подобро да си заминев во 2006 по втората титула на Алонсо", вели 59-годишниот Италијанец.

Бруно Сена признава дека размислувал да го смени своето презиме кога започна со професионалното тркање, но вели дека и така тоа не би било важно. Сена е внук од сестра на легендарниот трикратен шампион Аиртон Сена, кој загина во Имола во 1994 година, кога Бруно имаше 10 години. "Се надевам дека за кратко време сите ќе ме знаат како Бруно, а не по презимето на мојот вујко. Научив да живеам со тоа презиме, и иако ми помогна да најдам спонзори и договори на почетокот, размислував да го променам. Но, ако го направев тоа ќе направев поголема мшаница", вели Сена.

Нерамнината на средината на кривината шест предизвика внимание на многу возачи при првите две тренинг сесии на патеката Сакир. Оваа година се додаде нов дел од патеката во Бахреин, така што кривината на влезот на новиот дел има видлива нерамнина, што може да биде опасна кога болидите ќе стартуваат со 160 килограми гориво. "Многу е нерамно. Да се концентрираш за следната кривина е многу тешко бидејќи поминуваш низ тие нерамнини на шестата кривина, а главата ти оди нагоре-надолу", вели шампионот, Џенсон Батон.

Шефот на Ферари, Стефано Доменикали, продолжи со изјавите дека Скудерија не се фаворити на стартот на сезоната. "Важно е да почнеме различно од лани, но не сме на врвот, и заостануваме зад главниот ривал. Но, сезоната е долга и ќе видиме каква брзина ќе имаме на крајот. Остануваме смирени бидејќи е лесно да се занесеш на стартот на сезоната", вели Доменикали.