Светот нема да пропадне во 2012

Ако апокалиптичната планета веќе е на пат кон Сончевиот систем, тогаш веќе ќе можеа да се почувствуваат и последиците од нејзиното приближување

21:00 | 26.02.2010 | Автор: Шпиц

Блокбастерот „2012“ ја разбранува јавноста до толкава мера што експерти на Си-ен-ен мораа да објаснуваат дека тоа е само филм со добри ефекти и дека нема врска со реалноста. Кај нас, пак, многумина што на шега, што сериозно во поплавите, одроните и во расцепувањето на патот кај Ѓавато видоа остварување на пророштвото од филмот - светот да доживее катаклизма по две години. Идејата на филмот е преземена од верувањето на древниот народ Маи,

кој живеел во денешно Мексико. Според нив, во 2012 година во близина на Земјата ќе помине планета со големина на Јупитер, која ќе предизвика изумирање на животот на Земјата.
Е, сега тело со големина на Јупитер, која е најмасивната планета во Сончевиот систем, многу би влијаело врз целокупниот Сончев систем. Покрај Сонцето, кое со својата маса ги држи планетите и другите тела (астероиди, комети, метеороиди) во орбита околу него, така и самите планети си дејствуваат гравитационо едни на други. Исфрлете ја, на пример, планетата Сатурн од Сончевиот систем и веднаш ќе настанат промени на патеките на сите други планети.
Наводната планета Нибиру би требало да помине низ Сончевиот систем во 2012 година, што е за многу краток период, гледано астрономски. Штом таа планета за две години треба да помине низ Сончевиот систем, таа веќе би се наоѓала во него. Ако планетата веќе е на пат кон Сончевиот систем, тогаш веќе ќе можеа да се почувствуваат и последиците од нејзиното приближување. Значи, под дејство на нејзината гравитација, планетите ќе почнеа да прават промени во своите патеки, ќе настанеше една конфузија во целокупниот Сончев систем. Така што, не

треба да чекаме до 2012 година за да ги почувствуваме тие последици. Бидете сигурни дека ако ова беше вистина, немаше да треба некој да ви каже дека нешто „големо“ ни се приближува, туку сами ќе забележевте дека нешто не е во ред со нашата планета.
Доколку Нибиру сега би била во близина на Сатурн, според нејзината големина и растојанието што го има, би значело дека секој од нас би ја видел како една ѕвезда на небото. Доколку сте имале можност да станете деновиве пред да изгрее Сонцето и сте погледнале кон Исток, сигурно сте ги виделе планетите Јупитер и Венера близу една до друга. Значи и Нибиру би се гледала како нив, но најверојатно со нешто помал сјај.
Нашава планета е убаво место и ние треба да бидеме исклучително среќни што се наоѓаме на неа, па затоа искористете го секој момент што ви е пружен и уживајте во него. Земјата ќе си биде сина и убава и ќе ни го нуди и понатаму овој прекрасен дом.