Прилеп

Прилепчани ќе ги стават своите сурати за Прочка...........!!!

Учесниците ќе бидат маскирани во надалеку препознатливите етномаски, сурати со крзна, но многу од нив ќе бидат преправени според своите желби и креативна визија...Уште од дамнешни времиња хроничарите запишале дека прилепчани се познати по тоа што во чест на празникот Прочка се „преправаат“.
Маскирани во традиционални и во модерни маски тие ќе се обидат уште еднаш да го оживеат старинскиот адет на проштевањето, бегството на злите духови и доаѓањето на бериќетната година.

- Ќе бидам Крали Марко, јунакот над јунаци кој се враќа од Косово Поле да ги види Марковите Кули и градот Прилеп, внуците и правнуците - вели еден прилепчанец кој сака со коњ, маска на Крали Марко и со боздоган да продефилира низ градот.
Прилепчанецот Бранко Најдоски ќе се маскира во традиционална маска што сам ја подготвува од природни материјали.
- Ќе учествувам со маската според обичајот за празникот Тајане-бојана. Живеам за оваа манифестација. И во времињата кога преправањето, како што во Прилеп го нарекуваме маскирањето, беше неофицијално забрането, ставав сурат, бегав од полиција и го одржував адетот пренесуван од моите предци - вели Најдоски.

Постариот прилепчанец Стеван Митрески кажува дека е обичај за Прочка младите да ги посетат родителите и кумовите за да се простат.
- Има и адет амкање на варено јајце. Тоа е јајце врзано со конец на сукало, кое им се доближува до усните на децата и на возрасните. Оној што ќе успее да го фати со устата, без помош на рацете, се верува дека ќе биде касметлија цела година - раскажува Митрески.
. ....Прилеп ќе биде домаќин на 32. конвенција на Асоцијацијата на европските карневалски градови во 2012 година.....