Фан клуб Jувентус

По катастрофалните изданија сезонава во кои Јувентус испадна од домашниот куп, Лигата на шампионите, потоа се посрамоти во Лигата на Европа и што е најважно "Скудетото" управата веќе почна да ги бара причините за ваквата состојба. Низ клубот кружат информации дека Јувентус во летниот преоден рок ќе направи длабок "рез" во тимот со цел клубот да застане на здрави нозе и да почне да размислува за трофеи. Како прво управата посакува да ги "шутне" сите фудбалери кои дојдоа во клубот по препорака на италијанскиот селектор Марчело Липи.

Клубот почна да прави стратегија за идната сезона, а се очекува Липи по завршувањето на Светското првенство да ја напушти репрезентацијата и да стане претседател на торинскиот клуб и ќе биде задолжен за идните трансфери во клубот. 61-годишниот стратег мина две одлични сезони на клупата на "Старата дама", а на управата и го препорача Фабио Канаваро од Реал Мадрид, ја имаше улогата на советник при трансферите на Фабио Гросо и Фелипе Мело. Сите тројца разочараа и ќе бидат првите кои ќе го напуштат клубот ова лето.

Договорот на Канаваро истекува на крајот на сезоната, а продолжување на истиот нема да добие. Што се однесува до Гросо, тој има уште една година од соработката, меѓутоа ќе биде ставен на трансфер списокот и ќе биде продаден со оглед на тоа дека има заинтересирани купци за него. Истото се однесува и за Фелипе Мело, кој од дојде како големо засилување, а не покажа ни 10% од својот талент. Бразилецот најверојатно ќе биде продаден во Англија (заинтересиран е Арсенал).

Дури и фудбалерите како што се Давид Трезеге, Мауро Каморанези, Амаури, Момо Сисоко, Никола Легротаље и Хасан Салихамиџиќ нема да бидат поштедени. Се шпекулира дека Трезеге ќе се врати во Франција (како најсериозни кандидати за неговиот потпис се ПСЖ, Монако, Бордо и Марсеј), додека, пак, Каморанези би можел да замине во Англија или Шпанија. Амаури се повеќе е повреден отколку што игра и чека да се јават заинтересираните клубови, додека, пак, за Сисоко се интересираат неколку шпански и англиски екипи. До крајот на сезоната останаа уште девет кола, а Јувентус моментално е на шестата позиција на табелата со два бода помалку од четвртото место, последното кое води во Лигата на шампионите.