Преговори за името

На првото прашање „Кој треба да одлучува за промена на уставното
име“, најмногу, 44,6% од граѓаните, рекле дека тоа треба да бидат
самите тие на референдум. Скоро 30% сметаат дека спорот
треба да го решат политичарите, а само 21,2% рекле дека никој
нема право да го промени името.

На прашањето „Дали вие лично
поддржувате промена на уставното име“, нешто над 60% одговориле со
негативно, а 29,6% рекле ДА.

И додека за промена
граѓаните даваат каква-таква поддршка, огромно мнозинство се против
евентуалното решение да го загрози македонскиот идентитет. Скоро 85% од испитаниците рекле дека со решението тој треба да се
обезбеди, а за само 3,5% тоа не било битно.

Институтот за
демократија го испитувал мислењето на граѓаните за промена на уставното
име, но не и нивниот став за евентуална промена на името само за
меѓународна комуникација.

Резултатите до кои дојде А1 се сублимирани. Не е се познати податоците според етничка припадност на испитаниците.

Според
испитувањето на реномираниот „Галуп“ за 2009-та, 95% од
етничките Македонци се против промена на името, макар и тоа да и донесе
членство на земјата во ЕУ и НАТО.

Со ваквиот став се согласуваат
и четвртина од Албанците во земјава. Мнозинството од оваа заедница,
пак, или точно 67%, се изјасниле дека се подготвени да се откажат
од името на државата во име на евроинтеграциите.