„Во ударните термини се емитува неморал, каде што после 3 часа познанство 19-годишна девојка стапува во интимност со 33-годишен маж. Вториот ден се пренесува во живо интимноста која ја има во кревет одвај полнолетната девојка.“

А1 телевизија да не го емитува во ударен термин реалното шоу ’Голем брат’, бара Здружението на граѓани ’Младински центар Вруток’.

Според здружението, содржините кои ги гледаат речиси 200 илјади млади луѓе во земјава промовира промискуитет, неморал и погрешно однесување.

„Во ударните термини се емитува неморал, каде што после 3 часа познанство 19-годишна девојка стапува во интимност со 33-годишен маж. Вториот ден се пренесува во живо интимноста која ја има во кревет одвај полнолетната девојка. Ова не се нарекува љубовна врска затоа што актерите одвај се познаваат. Која е пораката од сето тоа? Каков пример им дава тоа на младите?“, се вели во реакцијата од Младински центар Вруток.

Оттаму остро реагираат на прикажувањето на шоуто и бараат А1 телевизија да не ги емитува овие неморални содржини во нивните утрински, пладневни и попладневни ударни термини.

„Во овие термини нашите млади, нашите деца треба да растат со цртани филмови и корисни едукативни програми. Последиците од прикажувањето се 30.000 заразени од хепатит Ц, 30 отсто од сексуално активното населене е заразено од кламидија и опасност од ХИВ.“

„Близу 200.000 претежно млади гледачи го консумираат неморалот. Промискуитетот станува прифатлива норма на однесување. Приватноста на секој поединец е негово право, но поведението во јавноста и пораките од националните телевизии треба да биде предмет на јавна загриженост. Тука не се работи повеќе за фиктивна сторија, туку пренос во живо на конкретен неморал, лош пример и погрешна порака.“

„За крај, ги повикуваме родителите и блиските на одвај полнолетната девојка да разговараат со неа и да и укажат на примерот кој таа го дава на сите тинејџери“, стои во реакцијата.