Survivor Србија

Survivor на телевизија Сител

На телевизија Сител од септември, ексклузивно, во 56 епизоди ќе почне да се емитува најгледаното светско шоу-реалити серијалот Survivor. Пријавувањето е во тек и е отворено до 20 мај за сите кандидати меѓу 18 и 55 години, кои се здрави и во одлична физичка кондиција, храбри, вешти и умни и кои умеат да преживуваат во племе. Survivor на двајца кандидати од Македонија им нуди бурно лето во Панама, заедно со учесниците од Србија и Босна и Херцеговина. Секако, дел од шоуто ќе бидат и македонски водители.

Годинава по втор пат Србија организира нов серијал на Survivor, но за разлика од минатото издание, вклучена е и телевизија Сител која проектот го работи во соработка со српската Фокс телевизија. На 25 мај, челните луѓе задолжени за шоуто, ќе бидат во Македонија на кастинг и ќе одлучат кои двајца Македонци ќе бидат дел од тимот кој ќе биде оставен во Панама да се снаоѓа и преживува. Бројот на учесниците кои ќе заминат во Панама уште не е одреден, ќе зависи од пријавените кандидати, но ќе биде од 30 до 50 учесници.

Кандидатите во биографијата што ќе ја пратат мора да наведат пол, датум на раѓање, адреса и место на живеење, контакт телфон, мејл адреса, степен на образование, професија, дали се вработени, ако да, треба да наведат каде, дали се осудувани, брачна состојба, како и причините поради кои се пријавуваат во Survivor.

Биографија со фотографија за пасош и фотографија на целата фигура се задолжителни, како и лични карактеристики поради кои би ве избрале токму вас за натпреварувач. Интересот за шоуто е огромен: за два дена кај нас се пријавени 150, а во Србија 11.000 кандидати. Пријавите се праќаат на адресата: Сител Телевизија, Градски стадион бб 1000 Скопје, Република Македонија или на survivor@sitel.mk. Учествувајте, преживувајте и освојте вредна парична награда и џип.

НАЈПОПУЛАРНО РЕАЛНО ШОУ ВО СВЕТОТ
Најпопуларното реално шоу на светот Survivor го создал британскиот телевизиски продуцент Чарли Парсон во 1992 година. Од тогаш Survivor неприкосновено царува на светските листи меѓу најгледаните шоуа и програми. Премиерно се прикажа во 1996 година во Шведска, под името Експедиција - Робинсон, а првата американска верзија е снимена во 2000 година. Шоуто веднаш се најде во ударниот термин на CBS телевизија и тука се задржа осум години. По Америка, епидемијата на Survivor се проширува низ остатокот на светот, а денеска се емитува во повеќе од 40 земји на сите континенти.