Пливање

Стефановски го преплива Ла Манш

Лондон, 14 август (МИА) - Македонскиот пливач-маратонец Томи Стефановски успеа да го препливува каналот Ламанш за време од 7 часа, 42 минути и 32 секунди.

Со препливувањето тој се стекна со националното спортско признание популарно наречено спортска пензија и по неговото пристигнување во Скопје свечено ќе биде примен во Агенцијата за млади и спорт.

На францускиот брег, кај пристаништето Кале, македонскиот пливач пристигна изморен, но пресреќен поради својот голем успех, особено што времето што го постигна е за речиси два часа подобро од она што пред тргнувањето во англиското пристаниште Довер го предвидуваа тој и екипата што го придружува.

Стефановски во првата половина од делницата, долга околу 34 километри, имал подобри услови, затоа што брановите биле мали, а ветерот поумерен, но во вториот дел на неговото пливање, на француската страна од каналот, временските услови се влошиле,а и морските бранови биле поголеми.

Томи Стефановски е третиот македонски пливач што ја поминал „класичната“ маратонска пливачка делница меѓу бреговите на Велика Британија и Франција. Пред него, прв тоа го направи Нико Нестор, во далечната 1959 година, а подоцна охриѓанката Атина Бојаџи, која борејќи се со големите и силни струи во Ламанш мораше да плива дури 13 часови за да стигне од Кале до Довер.

Стефановски тргна утринава околу 6 часот од Довер, каде неколку денови се подготвуваше чекајќи ја одлуката на британскиот капетан кога да го започне пливањето преку каналот.

Прв пат овој воден пат, што Англичаните го нарекуваат англискиот канал, а Французите Ламанш, го има препливано англискиот капетан Метју Веб, уште во далечната 1875 година. За овој „историски потфат“ на Веб тогаш му биле потребни повеќе од 22 часа пливање.

Досега над 100 пливачи, мажи и жени, на разни возрасти, го препливале каналот во едната или во другата насока.

Рекордот во препливување на делницата го држи Бугаринот Петар Стојчев кој го преплива каналот за помалку од седум часа.

Уште еден пливачки херој Македонец кој заслужува Национално Признание

Маратонецот Игор Димовски го преплива Ла Манш

Македонскиот маратонец Игор Димовски го преплива вчера каналот Ла Манш меѓу англиското пристаниште Довер и францускиот брег кај градот Кале, јави дописникот на МИА од Лондон.

Димовски е четвртиот македонски маратонец кој го препливал каналот. Пред него тоа им успеа на Нико Нестор во 1959 година, на Атина Бојаџи десет години подоцна и на Томи Стефановски минатата година.

Оваа патека меѓу британските острови и европскиот континент се обиде пред повеќе години да ја исплива и Ристо Бимбиловски, пливајќи во стил пеперутка, но се откажа пред да пристигне до  брегот на Франција.

Оддалеченоста меѓу Довер и Кале од 34 километри, Димовски ја препливал за околу 13 часа, што е повеќе од времето што тој и неговиот тренер го имаа испланирано. Беше предвидено Димовски да плива меѓу 7,5 и осум часа, но денеска времето и водите во Каналот не му беа наклонети на  маратонецот.

Тој тргна утринава рано од Довер во четири часот по совет на капетанот на придружниот брод, во обид да ја одбегне посилната плима што беше најавена. Димовски два дена чекаше и тренираше на британскиот брег додека да се намали силината на ветерот и на морските струи кои во каналот се тешко предвидливи.

Условите за пливање биле толку тешки, што  последните четири-пет километри од патеката Димовски беше принуден да ги плива дури околу пет часа. Тоа и предизвика неговиот подвиг да потрае до доцните попладневни часови.

Според изјавите на неговите придружници, Димовски излегол на францускиот брег мошне исцрпен, но за кратко успеал да се исправи задоволен  што од денеска и тој  е меѓу пливачите кои ја поминале оваа патека во маратонското пливање.

Веднаш потоа, нашиот маратонец и целата екипа што го придружуваше се вратија со бродот што го водеше при пливањето, назад кон Довер.

Ова беше првпат Игор Димовски да се обиде да го преплива Каналот, откако пред седум години целосно му се посвети на маратонското пливање. Тој има 33 години и повеќе од дваесет години е пливач. Досега учествувал на три маратони - на Охридското Езеро, во Грција и на Савскиот маратон кај Шабац.

Почина американски пливач за време на трка

Пливањето е спорт кој најмногу си го сакам.
И да гледам и да го практикувам.
Цело тело ти се активира, без многу напор а што е најважно и без потење.
А башка и уживанција, било лето било во зима.

Zlatnik напиша: Анастеа напиша: ... А башка и уживанција, било лето било во зима. И во двата случаја на отворено, нели?

Море Златнику, смешно е ама и не е смешно.
Од самата помисла дека зиме луѓето се бањаат во отворен базен, нели е одма реума да те фати.
Арно ама еве овој подолу на сликите, е еден таков базен на отворено, од комплексот со многу други, со топла вода, џакузи и меурчиња кои масираат.
А до него се излегува од покриениот базен со пливање, преку еден, како да го кажам - канал.
И оп: си пливкаш во топла вода, меурчиња те масираат а на главата ти врне снег.







Изменето од Анастеа - 11.Јуни.2014 во 09:11